1

Simplex in essentia,

Septiformis gratia,

Nos reformet Spiritus;

Cordis lustret latebras

Et carnis illecebras

Lux emissa coelitus.

2

Lex praecessit in figura,

Lex poenalis, lex obscura,

Lumen evangelicum.

Spiritalis intellectus,

Litterali fronde testus,

Prodeat in publicum

3

Lex de monte populo,

Paucis in coenaculo

Nova datur gratia.

Situs docet nos locorum,

Praeceptorum vel donorum

Quae sit eminentia.

4

Ignis, clangor buccinae,

Fragor cum caligine,

Lampadum discursio

Terrorem incutiunt:

Non amorem nutriunt,

Quem infundit unctio.

5

Sic in Sina

Lex divina

Reis est imposita,

Lex timoris,

Non amoris,

Puniens illicita.

6

Ecce patres praelecti

Di recentes sunt effecti:

Culpae solvunt vincula.

Pluunt verbo, tonant minis;

Novis linguis et doctrinis

Consonant miracula.

7

Exhibentes aegris curam.

Morbum damnant, non naturam.

Persequentes scelera,

Reos premunt et castigant:

Modo solvunt, modo ligant,

Potestate libera.

8

Typum gerit Iubilei

Dies iste, si diei

Requiris mysteria,

In quo tribus millibus

Ad fidem currentibus

Pullulat Ecclesia.

9

Iubileus est vocatus

Vel dimittens vel mutatus,

Ad priores vocans status

Res distractas libere.

Nos, distractos sub peccatis,

Liberet lex charitatis,

Et perfectae libertatis

Dignos reddat munere.