Profitentes unitatem

Veneremur Trinitatem

Pari reverentia,

Tres personas asserentes

Personali differentes

A se differentia.

Hae dicuntur relative,

Quum sint unum substantive,

Non tria principia.

Sive dicas tres vel tria,

Simplex tamen est usia,

Non triplex essentia.

Simplex esse, simplex posse,

Simplex velle, simplex nosse,

Cuncta sunt simplicia.

Non unius quam duarum

Sive trium personarum

Minor efficacia.

Pater, Proles, sacrum Flamen,

Deus unus: sed hi tamen

Habent quaedam propria.

Vna virtus, unum numen,

Vnus splendor, unum lumen,

Hoc una quod alia.

Patri Proles est aequalis,

Nec hoc tollit personalis

Amborum distinctio.

Patri compar Filioque,

Spiritalis ab utroque

Procedit connexio.

Non humana ratione

Capi possunt hae personae,

Nec harum discretio.

Non hic ordo temporalis,

Non hic situs, aut localis

Rerum circumscriptio.

Nil in Deo praeter Deum;

Nulla causa preter eum

Qui creat causalia.

Effectiva vel formalis

Causa Deus, et finalis,

Sed nunquam materia.

Digne loqui de personis

Vim transcendit rationis,

Excedit ingenia.

Quid sit gigni, quid processus,

Me nescire sum professus:

Sed fide non dubia.

Qui sic credit, non festinet,

Et a via non declinet

Insolenter regia.

Servet fidem, formet mores,

Nec attendat ad errores

Quos damnat Ecclesia.

Nos in fide gloriemur,

Nos in una modulemur

Fidei constantia:

Trinae sit laus Vnitati,

Sit et simplae Trinitati

Coaeterna gloria!