1

Ave, Virgo singularis,

Mater nostri salutaris,

Quae vocaris stella maris,

Stella non erratica;

Nos in huius vitae mari

Non permitte naufragari,

Sed pro nobis salutari

Tuo semper supplica.

2

Saevit mare, tremunt venti,

Fluctus surgant turbulenti;

Navis currit, sed currenti

Tot occurrunt obvia!

Hic sirenes voluptatis,

Draco, canes, cum piratis,

Mortem pene desperatis

Haec intentant omnia.

3

Post abyssos, nunc ad coelum,

Furens unda fert phaselum;

Nutat malus, fluit velum,

Nautae cessat opera;

Contabescit in his malis

Homo noster animalis:

Tu nos, mater spiritalis,

Pereuntes libera.

4

Tu, perfusa celi rore,

Castitatis salvo flore,

Novum florem novo more

Protulisti saeculo.

Verbum Patri coaequale,

Corpus intrans virginale,

Fit pro nobis corporale

Sub ventris umbraculo.

5

Te praevidit et elegit

Qui potenter cuncta regit

Nec pudoris claustra fregit,

Sacra replens viscera;

Nec pressuram, nec dolorem,

Contra primae matris morem,

Pariendo Salvatorem,

Sensisti, puerpera.

6

O Maria, pro tuorum

Dignitate meritorum,

Supra choros angelorum

Sublimaris unice:

Felix dies hodierna

Qua conscendis ad superna!

Pietate tu materna

Nos in imo respice.

7

Radix sancta, radix viva,

Flos, et vitis, et oliva,

Quam nulla vis insitiva

Iuvit ut fructificet,

Lampas soli, splendor poli,

Quae splendore praees soli,

Nos assigna tuae proli,

Ne districte iudicet.

8

In conspectu summi Regis,

Sis pusilli memor gregis

Qui, transgressor datae legis,

Praesumit de venia:

Iudex mitis et benignus,

Iudex iugi laude dignus

Reis spei dedit pignus,

Crucis factus hostia.

9

Iesu, sacri ventris fructus,

Nobis inter mundi fluctus

Sis dux, via et conductus

Liber ad coelestia:

Tene clavum, rege navem;

Tu, procellam sedans gravem,

Portum nobis da suavem

Pro tua clementia.