1

Laus erumpat ex affectu!

Psallat chorus in conspectu

Supernorum civium!

Laus iocunda, laus decora,

Quando laudi concanora

Puritas est cordium.

2

Michaelem cuncti laudent

Nec ab huius se defraudent

Diei laetitia.

Felix dies qua sanctorum

Recensetur angelorum

Solemnis victoria!

3

Draco vetus exturbatur

Et Draconis effugatur

Inimica legio;

Exturbatus est turbator

Et proiectus Accusator

A coeli fastigio.

4

Sub tutela Michaelis

Pax in terra, pax in coelis,

Laus et iubilatio;

Cum sit potens hic virtute,

Pro communi stans salute,

Triumphat in praelio.

4a

Michael, dux angelorum,

Qui draconem de coelorum

Profligasti sedibus,

Ne superbi deprimamur,

Fac demissos, ut iungamur

Per te coeli civibus.

5

Suggestor sceleris,

Pulsus a superis,

Per huius aeris

Oberrat spatia.

Dolis invigilat,

Virus insibilat,

Sed hunc annihilat

Praesens custodia.

6

Tres distinctae hierarchiae

Iugi vacant theoriae

Iugique psallentio,

Nec obsistit theoria

Sive iugis harmonia

Iugi ministerio.

7

O quam mirae caritatis

Est supernae civitatis

Ter terna distinctio,

Quae nos amat et tuetur,

Vt ex nobis restauretur

Eius diminutio!

8

Sicut sunt hominum

Divisae gratiae,

Sic erunt ordinum

Distinctae gloriae

Iustis in praemio:

Solis est alia

Quam lunae dignitas;

Stellarum varia

Relucet claritas:

Sic resurrectio.

9

Vetus homo novitati,

Se terrenus puritati

Conformet coelestium;

Coaequalis his futurus,

Licet nondum plene purus,

Spe praesumat praemium.

10

Vt ab ipsis adiuvemur,

Hos devote veneremur

Instantes obsequio:

Deo nos conciliat

Angelisque sociat

Sincera devotio.

11

De secretis reticentes

Interim coelestibus,

Erigamus puras mentes

In coelum cum manibus;

12

Vt superna nos dignetur

Cohaeredes curia

Et divina collaudetur

Ab utriusque gratia.

13

Capiti sit gloria

Membrisque concordia!