1

Gaude prole, Graecia;

Glorietur Gallia

Patre Dionysio.

Exsultet uberius

Felici Parisius

Illustris martyrio!

2

Speciali gaudio

Gaude, felix concio,

Martyrum praesentia,

Quorum patrocinio

Tota gaudet regio,

Regni stat potentia.

3

Iuxta patrem positi

Bellatores inclyti

Digni sunt memoria.

Sed illum praecipue

Recolit assidue

Regalis Ecclesia.

4

Hic a summo praesule

Directus ad Galliam,

Non gentis incredulae

Veretur insaniam.

5

Gallorum apostolus

Venerat Lutetiam,

Quam tenebat subdolus

Hostis, velut propriam.

6

Hic errorum cumulus,

Hic omnis spurcitia,

Hic infelix populus,

Gaudens idolatria.

7

Adorabant idolum

Fallacis Mercurii;

Sed vicit diabolum

Fides Dionysii.

8

Hic, constructo Christi templo,

Verbo docet et exemplo,

Coruscat miraculis.

Turba credit,

Error cedit,

Fides crescit

Et clarescit

Nomen tanti praesulis.

9

His auditis, fit insanus

Immitis Domitianus

Mittitque Sisinnium,

Qui pastorem animarum

Fide, vita, signis clarum

Trahat ad supplicium.

10

Infliguntur seni poenae,

Flagra, carcer et catenae;

Catastam, lectum ferreum

Et aestum vincit igneum.

11

Prece domat feras truces,

Sedat rogum, perfert cruces,

Post clavos et patibulum

Translatus ad ergastulum

12

Seniore celebrante

Missam, turba circumstante,

Christus adest, comitante

Coelesti frequentia;

Specu clausum carcerali

Consolatur et vitali

Pane cibat, immortali

Coronandum gloria.

13

Prodit martyr conflicturus,

Sub securi stat securus:

Ferit lictor

Sicque victor

Consummatur gladio.

Se cadaver mox erexit.

Truncus truncum caput vexit,

Quo ferentem hoc direxit

Angelorum legio.

14

Tam praeclara passio

Repleat nos gaudio!