1

Lux advenit veneranda,

Lux in choris iubilanda

Luminosis cordibus.

Huius laeta lux diei

Festum refert matris Dei

Dedicandum laudibus.

2

Vox exsultet

Modulata,

Mens resultet

Medullata,

Ne sit laus inutilis!

Sic laus Deo

Decantetur

Vt in eo

Collaudetur

Mater eius nobilis!

3

Gloriosa

Dignitate,

Viscerosa

Pietate,

Compunctiva nomine,

Cum honore

Matronali,

Cum pudore

Virginali,

Nitet coeli cardine.

4

Rubus quondam exardebat

Et tunc ardor non urebat

Nec virori nocuit:

Sic ardore spiritali

Nec attactu coniugali

Virgo Deum genuit.

5

Haec est ille fons signatus,

Hortus clausus, fecundatus

Virtutum seminibus.

Haec est illa porta clausa,

Quam latente Deus causa

Clauserat hominibus.

6

Haec est vellus trahens rorem,

Plenus ager dans odorem

Cunctis terrae finibus.

Haec est virga ferens florem,

Terra suum Salvatorem

Germinans fidelibus.

7

Haec est dicta per exemplum

Mons, castellum, aula, templum,

Thalamus et civitas:

Sic eidem aliorum

Assignatur electorum

Nominum sublimitas

8

Cuius preces vitia,

Cuius nomen tristia,

Cuius odor lilia,

Cuius vincunt labia

Favum in dulcedine.

Super vinum sapida,

Super nivem candida,

Super rosam rosida,

Super lunam lucida

Veri solis lumine.

9

Imperatrix

Supernorum,

Superatrix

Infernorum,

Eligenda

Via coeli,

Retinenda

Spe fideli,

Separatos

A te longe,

Revocatos

Ad te, iunge

Tuorum collegio:

Mater bona

Quam rogamus,

Nobis dona

Quod optamus,

Nec sic spernas

Peccatores

Vt non cernas

Precatores;

Reos sibi

Diffidentes,

Tuos tibi

Confidentes

Tuo siste filio.