Postquam Migdonias bellatrix Fama per urbes

Armorum vulgavit opus, concussa minaci

Barbaries motu trepidis coniurat in arma

Viribus, et totos Priamo Mars excitat ortus.

5

Primus opes Frigibus Zelia tradente sequaces

Commodat Amphion, socium cui Pandarus arcum,

Consortem Adrastus gladium rapit. Hospes iturum

Instruit Amphimacum Colofonia, ducit alumpnam

In bellum Liciam socio Sarpedone Glaucus.

10

Marticole Traces Xantippum, Mennona Mauri,

Peonide Phorcum, sequitur Cizonia Remum.

Euphemus et Capesus et, quorum nomina longum

Equato sermone sequi, stipare cohortes

Certant et sese numero vel robore vincunt.

15

Dat Ganges Arabem, Sirium largitur Orontes,

Dat Sciticos Tanais geminoque obnoxia mundo

Ripa duplex bellis populum partitur utrumque

Nacta ducem geminum. Migratque in prelia, quicquid

Prima dies, orbis oriens, cunabula Phebi

20

Gentis alunt, quicquid Asie dispendia, quicquid

Hermus aquis Taurusque iugis includit, et omnis

Yliacos legio tendit munire penates.

Hos inter fremitus certantumque ardua regum

Robora pugnaces iactantius armat alumpnos

25

Troia potens nulloque locum sperante priorem

Indigene vires cognataque celsius arma

Consurgunt. Toto sed Troilus agmine princeps

Pulmineusque Hector; par bellis impetus, equa

Vulgi tempestas; titulis precellere certant,

30

Et dubia alterno contendit fama favore.

Cetera fraterni Martis numerosa potestas,

Ductu queque suo discretis fulminat ausis,

Vt quot Priamidas tot iurent Hectoras esse,

Quot Troes tot, macte, pares tibi, Troile, dicant.

35

Nunc utinam, quo quisque animo, quo fulserit ore,

Quis membris inscriptus honos, quis pectora motus

Extulerit, meminisse queam, vultusque peremptos

Suscitet eloquii virtus, oculisque sepulti

Pectoribus vivant scripto precone tiranni!

40

Sic olim positos populis mirantibus offert

Elinguis pictura viros, sic culta profatur

Carta duces, oculis hec blandior, auribus illa.

Celsa duci Priamo late surgentibus armis

Effulcit roseum cervix caput, ardua scribunt

45

Membra virum, blandoque genas terrore minaces

Regius ornat honos. Placide vox nuncia mentis

Nil tumidum, nil triste sonat propiorque precanti

Mollibus imperiis famulantes instruit aures.

Hector magnanimum librato culmine pectus

50

Erigit, intorto candet coma crispa capillo

Succinctum complexa caput blandeque recisos

Furatur vox blesa sonos. Pernicia membra

Mens placida in cives, faciem lanugo serenam

Induit. At visus acies obliqua cadentes

55

In geminas spargit partes semperque supina

Occiduo stabilem contristat lumine vultum.

Ore pares patremque genis vultuque secuti

Priamide gemini, studio certante Minervam

Partiti colit hic artes, hic arma fatigat;

60

Deiphebum Mavors, Helenum demulcet Apollo.

Troilus in spacium surgentes explicat artus,

Mente Gigas, etate puer nullique secundus

Audendo virtutis opus, mixtoque vigore

Gratior illustres insignit gloria vultus.

65

Imperii cupidus, habiles prolatus in armos

Siderea vernat acie Paris, ore serenus,

Eloquio lenis, pede preceps, strenuus armis,

Vertice flavescens; frontemque auctura superbam

Prereserat tonsura genas in summa recurrens

70

Tempora, neve vagans forme furetur honorem

Cesaries, utramque comam sua detinet auris.

Crine minax, vultu placidus, sermone serenus,

Affatu facilis, oculo nigrante venustus

Consiliisque pius stabiles libratur in artus

75

Eneas fusis humeris et lumine grandi.

Anthenor tenui productus corpore, sura

Succincta, motu facili, quo nemo suorum

Insidias vel nosse prior vel nectere maior.

Regius incendit Hecubam decor, ardua pingit

80

Gloria, nec partu species effeta frequenti

Marcida vectoris uteri dispendia sentit.

Mens victrix nil molle monet, nil debile dictat;

Sonti difficilis, at miti blanda rigorem

Exuit, afflictis clemens et civibus equa.

85

Forma, modus, pietas, sensus, pudor auctius ornant

Andromachen erectam humeris visuque serenam.

Non membris egressa modum, non ceca futuri,

Fulta gena tereti, suspecto crine cruorem

Mentitur flagratque acie Cassandra micanti.

90

Yliadum populo victore Polixena vultu

Preradiat, solique decus speciale meretur

Lactea membrorum series, ridentis ocelli

Blandicie, pede fulta brevi procera venustas

Poplitis erecto librans vestigia gressu.

95

Articulos non equat ebur, non lilia colli

Ardua, non rutilum pavonis fimbria crinem.

Ipsa humilis, simplex, facilis nil turget herile,

Nil varium fingens, numquam frustrata petentes.

Martius ornat honos Agamennona, fusa vigorem

100

Celsaque membra vovent, voltu precone potestas

Enitet et regem species armata profatur.

Mixta virum phalerant cirro candente: decora

Virtus, nobilitas dives, facundia prudens.

Gratior equato Menelaum forma venustat

105

Fulta statu; virusque come geniale rubentis

Mens domat, ipse actu mentitos indice crines

Arguit, acceptus noto gratusque merenti.

Audax, munificus, hilaris, pius equat Achilles

Vultu Phebum, animo Gradivum, Pelea membris.

110

In pectus laterum laxatur culmen, in arctos

Crispatur cirros coma mirtea, crinis in armos

Deprimitur, poplesque gradus consurgit in altos.

Actorides acie grandi vernaque, decoris

Artubus, alloquio leni, cui cura iuvare

115

Muneribus, constare sibi, disponere cunctis.

Vox teneris discincta iocis, mens ardua, fusi

Artus Locrensis titulos Aiacis opimant.

Aiacem Thelamone satum coma pulla venustat

In torquem collecta levem, modulata serenis

120

Lingua sonis, mens fraudis hebes, sed strenua bellis.

Ore hilaris modiceque humiles collectus in armos

Dux Ithacus, prudens consultum pendere, gnarus

Obliquare dolos, doctus captare loquendo.

Voce ferox, animo preceps, fervente cerebro

125

Audentique ira validos quadratur in artus

Titides plenisque meretur Tidea factis,

Sic animo, sic ore fero, sic fulminat armis.

Nestora magnificat morum prudentia custos,

Consilii librata fides et sobria dandi

130

Gloria; porrectoque humeris senioque nitenti

Nasi grata minus brevitas incurva sedentis.

Phillacides vernante gena, candente capillo,

Alite mobilior, Scitica torrentior aura,

Ardua nulla timens, animum non viribus equans

135

Nil grave, nil durum censet, nil linquit inausum.

Ore virum fassus indignantique minaces

Suspendens cervice genas livore superbo

Obliquat socios Pirrus, scribuntque ferocem

Ardua membra, teres oculus, proiectior alvus.

140

Texendis vox egra sonis teneroque laborans

Eloquio lingua blesos frustratur hiatus.

Naupliaden tenui progressum corpore, lenem,

Magnanimum prudens animi moderatur honestas.

Arduus in fastum, pingues demersus in artus

145

Crispanti vestit humeros Polidarius umbra.

Cesaries ceu iussa iacens, patientia suplex,

Vis temere ausa nichil pietasque Machaona pingunt.

Impia precipitem natura Meriona mergit

Invidie cinctum stimulis cureque tenacis

150

Defessum excubiis. Teretes cumulatur in artus

Carnea massa tumens, animique ebullit Herinis

In caput, in corpus reliquum: Livescit inustum

Sanguineis pectus maculis, gena disputat idris

Indicio peiore virens, et mentis hanelas

155

Accusant Furias flammati incendia crinis.

In medium librata statum Briseis heriles

Promit in affectum vultus. Nodatur in equos

Flavicies crinita sinus, umbreque minoris

Delicias oculus iunctos suspendit in arcus.

160

Divicius forme certant insignia morum,

Sobria simplicitas, comis pudor, arida numquam

Poscenti pietas et fandi gracia lenis.

Tindaridis geminis geminum nichil, unicus ambos

Oris honos ambit; similis flavescit utrique

165

Crinis, par hilares augescit visus in orbes;

Equus membra modus, concordes pectora motus

Conciliant spirantque unum gena, lumina, mores.

Sola pares variis presumunt nomina formas

Distinxisse notis, at victor vindice vultu

170

Eludit dubios error vocumque repugnans

Discidio alterno confundit nomine nomen.

Inclita cognatos equat Spartana Lacones

Vultu, crine, genis; socie cunabula stirpis

Par oris testatur honos. At plenius haurit

175

Sidereum Ledea Iovem totosque per artus

Lactea materni spirant mendacia cigni.

Nativum frons fundit ebur, caput exerit aurum

Equatis crinale comis, gena candida bissum

Equat, dextra nivem, dens lilia, colla ligustrum.

180

Auris inexpleto crispata volumine, visus

Excubitor nasusque vagi venator odoris

Alternum poscunt titulo certante triumphum.

Productum modice mentum candescit et alta,

Lenius ut pressis insidant basia labris,

185

Parcius in roseum consurgunt ora tumorem.

Fundit apex humeros, pressum tegit ubera pectus,

Ilia succingit levitas tractusque lacertos.

Pes brevis incessu terram libante supino

Lascivum suspendit iter crurumque decora

190

Mobilitas compto libramine ponderat artus.

Sola superciliis labes interflua raris

Audaci macula tenues discriminat arcus.

Haut minus insignes latebras secretius ornat

Vitalesque colit thalamos et digerit urbem

195

Interior natura suam. Cor principe motu

Libratum disponit opus, modulamina lingue

Limat pulmo loquax, modico dispensat hiatu

Splen risum, facili fel castigatius ira

Vritur. At teneri titillat mollius equo

200

Pruritus iecoris meriteque insignia fame

Mergens nativi titulos incestat amoris.

Hoc monstrum non ales edax, non labile saxum,

Non axis torquens, non mendax vicerit unda;

Cum bene fracta tepet moriturque sepulta libido,

205

Respirant plenis incendia pristina fibris.

Sic Helenen totam pars unica mergit et ipsum

Excitat in cladem regnis certantibus orbem.

Iam Pandionios collato robore portus

Argive tenuere rates spaciumque negabat

210

Terra viris, velis aer et puppibus equor,

Cum tandem licitos poscebant bella meatus

Et iussas libare vias. At Delphica missus

Fata exoratum refugasque evolvere Parcas

Actoride socio Phebum prelibat Achilles.

215

Mira fides! Quos precipites in prelia traxit

Impetus atque omnis nocuit mora, sponte quietis

Pigrescunt votis placideque oracula poscunt;

Egra dolor differt suspiria, gloria palmam,

Ira minas; herent suspensis agmina bellis

220

Expectatque antri veniam Mars ipse loquacis.

O variis delusa modis nox credula cure

Gentilis! Risu an lacrimis an flente cachinno

Egipti portenta querar? Memphitica sulcos

Relligio vestit, in cortice marcet, in hortis

225

Crescit, nunc terra serpens, nunc aera sulcans.

Plus errant responsa tamen, plus spiritus ille,

Quem misere poscunt anime, quem nomine pulchro

Presumunt censere deum. At non mugit in antro,

Quem suus auctorem mundus sonat. Ista priorum

230

Noxia simplicitas in nostros defluit annos

Incestatque fidem. Nam ceu Balearicus augur

Gentiles distinguit aves vel voce vel alis

Vel gustu vario venturis omina ducens,

Ridentem sic odit anus presaga soporem,

235

Sic oris vacui casum timet, augure plausu

Pierie volucris aut indice nunciat aure

Hospitibus numerum discessurisve recessum.

Multa quidem captata diu fortuna secuta

Expedit, insidiansque hostis male credula fallit

240

Pectora, ut in fatuum declinent pronius usum.

At melius, ne labe levi mens casta labaret,

Augurium nescisse fuit, veterumque sepulti

Cessassent ritus, quorum decreta secuti

Graiugene summis oracula Delphica votis

245

Implorant! Prior Eacides lictoribus aras

Ambit et has donis tandem sollempnibus emptas

Inachidis voces pandit venalis Apollo:

"Vincitis, ultores Danai, grave Marte bilustri

Heret opus, decimum sequitur victoria bellum".

250

Talibus Eacides fatis excitus in omnes

Secretum tripodum socios partitur. Et ecce

Testorides Calchas mediis congressus in antris

Concordesque deos et consona fata revolvit.

Hic patrie et propriis scitatum oracula regnis

255

Venerat, hosque aditis monitus effudit ab isdem

Numen idem: "Non, o superis gratissime vates,

Vana petis. Dabitur patriis clementior aer

Sulcis, ieiuni populator Sirius anni

Occidet et plenis pinguescent messibus agri.

260

Tolle moras, te bella vocant, pete Cicropis urbem,

Vltrices dispone acies! Tibi bellica cedet

Turba manu, Mopsus oculis et pectore Nestor.

Sera quidem sevisque virum mercanda ruinis

Inachidas lustro ditabit palma secundo".

265

Ergo hilares socias iungunt in federa dextras

Eacides Calchasque pares. Quippe altus utrique

Gentis honos, regni equus apex; at maior Achilli

Spirat amor belli, Calchas tranquillior extis

Evolvisse deos et celi nosse meatus.

270

Tres unit iurata fides, consortia prima

Tercius auget amor nec, iam partitus amicum,

Invidet Actorides, sed pontum letior haurit

Et reducem torquet socio Calchante carinam.

Vt tripodum vulgata fides per castra, per urbem,

275

Per puppes certo iam claruit indice, cunctos

Bella iuvant, cunctis iam pulchrum vincere, tardum

Marte frui. Munit eques armis, nauta cherucis,

Civis messe rates. Pauci, quos debile pectus,

Mens plebea, iacens animus nescire triumphos

280

Iussit et abiecti mersit caligine fati,

Aut acies metuunt aut lente vincere dampnant

Longa decennalis mensi dispendia belli,

Cum casus varii cedant, cum prelia nulli,

Sanguine cum multo paucorum gloria vincat.

285

Hos tamen, hos etiam regum reverentia flectit

Et passura pares consors vicinia motus.

Ergo animos hebetes mendax audacia frontis

Dissimulat clamorque minax despumat in ausus.

Haut mora, corripiunt classes hiis pendula pandit

290

Dextra sinus, cervix alios defixa fatigat

In fluctus latura rates, hii robore textas

Edificant in transtra vias, mordacis habene

Nexibus indulgent alii laxantque carinas,

Cum subito egressos inopino turbine turbat

295

Nimborum pincerna Nothus noxque imbribus haustis

Ebria tela, viros, puppes humentibus umbris

Involvit cogitque ipsos dubitare magistros.

Errat ceca freti classis solitosque procella

Egressus obiecta negat, fluitantia pinum

300

Percellunt mediam repetito verbere vela.

Primus ut a prora surgentes conspicit imbres

Testorides frustraque duces contendere, divos

Presago iubet ore sequi, nolentibus Austris

Cedere et armatos ordiri ex Aulide cursus.

305

Parent Eolios nutus vatemque secuti

Graiugene et flexis repetentes Aulida proris

Montivage Phebes pacem implorantibus aris

Conciliant largoque exorant thure meatum.

Ilicet irato bibule Thaumantidos arcu

310

Ceruleum mutante iubar veroque sereno

In risum redeunte polo detersa meretur

Iuno Iovem atque hilari solatur flentia vultu

Nubila, proscriptoque Notho lenique susurro

Dante vias maiora petit suspiria classis.

315

Ergo deum nutu libratis flatibus usa

Euboicas numerosa ratis descendit in undas

Consumptura fretum; totum sub puppibus equor

Ire stupet. Certat perplexis navita remis,

Quis prior, et iunctis confligunt ictibus era.

320

Sic geminas miratus Athos Xerseius umbras

Ignotum velis texit mare, sic tua silve,

Voce potens Orpheu, modulantia plectra secute

Bistonios longis clausere amplexibus agros.

Dum mediis spaciantur aquis securaque fandi

325

Ocia sopitus pelagi non invidet estus,

Iasonium relegens Philotetes previus equor

"Has", inquit, "passi sirtes, hiis hesimus undis,

Hos Cianes tulimus scopulos Frixea secuti

Vellera. Lenniacis domus hec, Tracensibus illa,

330

Hec Paros, hec Naxos". Sic cuncta rogantibus heros

Explicat agnoscens veteris vestigia cursus

Esoniasque vias; sic, que subeunda, magistrat,

Que vitanda, docet. Cum tandem hostilis harene

Allapsi gremio, sevis clangoribus urunt

335

Aera et iratis impingunt litora tonsis.

Protinus effuso per castra, per arva tumultu

Litoreas populantur opes et proxima ponto

Menia Dardanii titulo male tuta tiranni.

Tandem congestis spoliis et divite preda

340

Consumunt inopes flamma victrice penates

Ac classes repetunt et, quas fecere, favillas

Illabi mediis gaudent per cerula velis.

Prima tulit Tenedos graviores militis iras,

Non solas dequesta faces non rapta metalli

345

Pondera, sed prorsus gladii consumpta furore

Exspirasse gemit. Iugulum puer ensibus affert

Inberbem tremulumque senex et tiro comantem.

Hic ducibus strepitu sedet expectare sepulto

Yliaci responsa ducis. Calidonius heros

350

Decreto procerum socio legatus Vlixe

Deligitur, qui dicta ferat, qui pace sequestra

Res Danaum, Sparte spolium raptamque reposcat.

Interea Eaciden stimulantibus excitat ausis

Impaciens languere animus, furor intima pulsat

355

Martius et residem mens arguit effera dextram.

Consorti studio similis preconia fame

Telephus affectans it iuncto robore Mesos

Predaturus agros. Venientia bella Caicus

Horret et in voces cantu stridente remissas

360

Plangit alumpnus olor; peregrinum Naiades hostem

Non ause vidisse timent tutasque sub undis

Venantur latebras; pecudum lascivia cessat

Iam studiosa minus et floris et amnis et umbre.

Quippe ferox urbes, fluvios et pabula turbat

365

Eacides. Rapitur, quicquid vel dulce vel usu

Egregium vel Marte iuvans vel pace decorum.

Cultores iuga questa boves fugiente colono

Decisum mirantur opus, mirantur abactum

Septa gregem. Quacumque vagum fert impetus hostem,

370

Castra, case, sulci, silve testantur Achillem.

At Teutras, postquam bella increbrescere sentit,

Civiles miseratus opes et numina ruris

In predam cessisse novam, parat arma, cohortes

Excitat et totis occurrit viribus hosti.

375

Eacides oblata nove preconia palme

Letatus variis intentas raptibus alas

Colligit hostilemque addens in verba cachinnum

"Sistite" ait "defensor adest" nec plura; feroxque

Fertur in obiectum nimbis torrentior hostem

380

Ense metens medios prostratamque impete primo

Calcat equo victore aciem. Res plena stupore

Turba fugit solusque fugat. Sic igne trisulco

Tota pavet percussa domus, pars etheris iram

Sentit, at in cunctos spargit sua fulmina terror.

385

Haut aliter dire furiis exterrita dextre

Barbaries dat terga viro. Fugientia primus

Indice deprendit curru vestigia regis

Eacides, quippe eris apex radiantis inertes

Accusat latebras. O noxia gloria rerum!

390

Tuta inopes fatis adimit fuga, notus in auro

Dux timet et vite discrimina ditia gestans,

Cum vellet latuisse, perit. Iam seva cruores

Hasta alios haustura fuit primusque tepebat

Mucro, cum parma repetitum Telephus ictum

395

Depulit obiecta dextramque elusit inanem.

Missilis innocui mixta pudor asperat ira

Eaciden, frendit atque ignescentia torquens

Lumina "Tune meos" ait "ausus fallere nisus

Et steriles cassare minas?" Sic fatus in ipsum

400

Vibrasset iaculum, timido cum Telephus ore

"Heu parce!" exclamat. "Procul hec, fortissime gentis

Mirmidonum, avertant superi probra! Tune bis ullum

Percuties? Hostem quisquis vel sensit Achillem,

Sufficiat cecidisse semel; tua fulmina passus

405

Alterius non mortis eget. Cur torva minaris?

Non tegimus, meruitque tamen. Scis ipse tumultus

Et Diomedei furias gregis: Atra nefandi

Septa ducis longis hominum saciata ruinis

Herculea cecidere manu, stratoque tiranno

410

Tutior in patriam reducem Teutranta regressus

Post crebras acies et equorum bella recepit.

Ipse triumphanti satus Hercule Mesa subisse

Regna ducisque hospes blandos coluisse penates

Gratulor ac memini gratus. Sed dicere longum,

415

Que mecum gessit patris memor. Hinc michi lapsum

Erigere et gladios tutari cura timentem.

At tardum venisse pudet. Quin Martia magnum

Si manus Eaciden, ut non sensura fatiget

Membra, trahit facilique animo nova suadet Herinis

420

Vltra velle nichil, nil citra posse ferendum,

Cedimus hosque artus gelidos, hec reddimus exta

Victrici calcanda rote". Sic fatus in altum

Sublato clipeo, pavide tamen, ultima questum

Fata ducem monstrat: Friget cruor oraque pallent

425

Eluctante anima. Tandem miseratur Achilles

Agnoscitque manum. Sic multis sera furorem

Temperat et penis tandem saciata supremis

Illaudata feros differt clementia motus.

At Teutras, ubi dira egris insidere fibris

430

Altius et certam minitantia vulnera mortem

Sentit, "Habe Mesos" inquit; "te, Telephe, noster

Poscit honos. Quis enim propior, quis dignior heres?

Me tuus Alcides Tracensi urgente tiranno

Edomitis absolvit equis sceptrique quietem

435

Sanxit et armatos in pacem reddidit annos.

Hiis meritis tibi regna damus, que perfida fati

Ira negat predata michi. Te lenius astrum

In senium serosque dies et summa reservet

Tempora regno hilarem!" Vix hec, et frigida fessis

440

Atropos inserpit labris, turbata rigescunt

Lumina, hebent sensus vivoque exuta calore

Membra gelu letale subit, mens libera tandem

Evolat et socios redit inspectura Triones.

Telephus, ut vacuos spiranti sanguine vultus

445

Conspicit, effuso miseranda in vulnera fletu

Funus herile struit. Quicquid vel mulcet odore

Vel virtute ligat nervos artusque fluentes

Continet, aggeritur busto. Compescit hiantem

Dextra premens ictum, fluxum domat arcta cruorem

450

Fascia et obstrusos frustra negat ire meatus.

Regia conspicuis moles inscripta figuris

Exceptura ducem, senis effulta columpnis

Tollitur. Electro vernat basis, arduus auro

Ardet apex radioque stilus candescit eburno.

455

Hiis excepta silex artus clausura verendos

Iaspide vestitur. Gemme, quas litoris Indi

Dives harena gerit, aurum, quod parturit Hermus,

In varias vivunt species, ditique decorum

Materie contendit opus. Quod nobile ductor,

460

Quod clarum gessit, ars explicat, ardua pandit

Moles et totum reserat sculptura tirannum:

Prima ducis facies nascenti vagit in ere

Sidoniis velata togis, cunalis in altum

Surgit honos, trepide circum nutrixque parensque

465

Alterno teneros demulcent ubere fletus.

Proxima lascivis inhians discursibus etas

Nunc labente pila, nunc se volvente fatigat

Buxo, nunc arcu; credas curvata coire

Cornua et excussam nervo stridere sagittam.

470

Tercia magnanimi loquitur primordia regis

Accingens pictura virum. Regale verendas

Accendit diadema comas, sublime sedentem

Fulcit ebur sceptroque manus radiante superbit.

Ipse nova vultum pictus lanugine regni

475

Maturum dispensat opus belloque togaque

Alternus - rerum vario poscente meatu -

Commodat aut fremitus armis aut ocia paci.

In serum perducta senem pars ultima canos

Colligit, et raris sulcantur tempora rugis

480

Progressos testata dies. Procul exitus evi,

Mors longe, et Lachesi stamen vitale ministrat

Nondum fessa soror. At Fato maior Herinis

Precipitat festina ducem. Tres ere propinquo

Herent: irata Pelides fronte, precanti

485

Telephus, exanimi Teutras. Pallere videres

Ora, genas, aurumque mori; cruor altus in auras

Exilit et minio rorant tabulata fluenti.

Hec super exiguo breviter collecta sigillo

Fata viri, quis regis honos, quis funeris auctor,

490

Quod fatum, que causa, patentque hoc singula scripto:

"Dux Teutras, Mesis decus arvis, passus Achillem

Ense necem sensit sceptri defensor aviti".

Postquam busta ducis nigro deplanxit honore

Fida manus mestaque ulutatum voce quievit

495

Supremo iam fine "Vale!", redeuntia ducit

Agmina Pelides, urbes invitus amicas

Telephus et socios recturus linquitur agros.

Ipse quidem plus pace acies, minus ocia bellis

Poscat et armate malit discrimina vite

500

Spe palme, at populi dilecto principe nudi

Merentes vicere preces, ut regis iniret

Excubias molemque datam; monet ipse futuri

Providus Eacides cultis insidere regnis,

In sulcos laxare solum, producere fruges

505

Et missa socias solari messe cohortes.

Sic paribus vincent titulis, cum ad prelia donet

Ille dies ipsique manus. Hec fatus Achilles

Ad Danaos maturat iter. Sed venerat ante

Dux Ithacus bellum referens pacemque negatam

510

Nunciat. Egrescunt indignanturque Pelasgi,

Bella petunt, hesisse dolent et frondibus hostes

Palladiis temptasse pudet. Iam libera Marti

Laxat frena Furor, stimulat Bellona volentes,

Mars cogit dubios. Ingens per castra furentis

515

Interpres animi clamor tonat, arma capessunt,

Arma fremunt, augent lituique tubeque tumultum

Et responsuris invitant vocibus Eccho.

Isset in Yliacos classis Pelopeia portus

Non expectata venia ducis, at nocituras

520

Nox nectit vicina moras humilemque soporat

Decrepitus Titana dies et hanela sub undas

Admittunt radios Athlantia litora fessos.