His Brutus, avito

Sanguine Troianus, Latiis egressus ab oris

Post varios casus consedit finibus, orbem

Fatalem nactus, debellatorque gigantum

5

Et terre victor nomen dedit. Inclita fulsit

Posteritas ducibus tantis, tot dives alumpnis,

Tot fecunda viris, premerent qui viribus orbem

Et fama veteres. Hinc Constantinus adeptus

Imperium Romam tenuit, Byzantion auxit.

10

Hinc Senonum ductor captiva Brennius urbe

Romuleas domuit flammis victricibus arces.

Hinc et Sceva satus, pars non obscura tumultus

Civilis, Magnum solus qui mole soluta

Obsedit meliorque stetit pro Cesare murus.

15

Hinc celebri fato felici floruit ortu

Flos regum Arturus; cuius cum facta stupori,

Non micuere minus, totus quod in aure, voluptas

Et populo plaudente favus. Quecumque priorum

Inspice: Pelleum commendat fama tirannum,

20

Pagina Cesareos loquitur famosa triumphos,

Alciden domitis attollit gloria monstris,

Sed nec pinetum corili nec sidera solem

Equant. Annales Latios Graiosque revolve:

Prisca parem nescit, equalem postera nullum

25

Exhibitura dies. Reges supereminet omnes

Solus, preteritis melior maiorque futuris.