Hec sunt opprobria mundi

Tu rapis omnia, deteris omnia, munde caduce,

Ceca tibi via pronus abis quia tu sine luce.

Tu nivis instar, nemo tibi par, ipse nec umquam

Par eris ulli commode nulli stas quia nunquam

5

Lubrice, labilis, exiciabilis omnibus eque.

Qui renuunt sua dum cupiunt tua gaudia teque

Deliciis vincis, viciis quos denique vincis.

O lacus aride, sordide, perfide, mortis imago,

Fossa patens es, tabe scatens, tenebrosa vorago.

10

Munde fugax, es morte minax, tua sponsio nugax,

Federe fallax, perdere verax, prodere sagax.

Tu male trux, es ad infera dux, ubi nulla viget lux.

Lutea fex, certissima nex, est quod tua lex.

Fraus laquei, cava faux e putei, cariturati diei;

15

Fede cinis, nichil esse sinis, mundum, quia finis!

Omnia luctu, perpete ductu, tu sine fructu.

Sepe virescis, per breve crescis, flos, quia vernus,

Postquam pusillum demetit illum tristis avernus.

Qui tibi credit, nil sibi cedit rite serenum,

20

Qui tibi paret, marcidus aret spe quasi fenum.

Atra lues, immundus ut es, et crimine putens,

Fluxa strues, cito munde rues, tecum ruet utens,

Sordida tabes, dic quid habes tu quod sit honestum

Lubrica labes, quicquid habes, est iure molestum

25

Ergo miliciam que deservit tibi dicam.

Omnem nequiciam peccandi ducis amicam

Omnem mundiciam, quia semper habes inimicam.

Totus avaricie se conciliat tibi questus

Omnis luxurie tibi servit sordidus estus

30

Astat et invidie cetus semper tibi mestus.

He tres pestes tres sunt hostes, mors animarum

Que mala fedant, qui bona sedant, trigenarum.