Postquam bella stilo studui percurrere retro,

Que Karolus gessit, eius describere mortem

Nunc cupio; quam sic transacto tempore parvo

Cognovi donante Deo. Dum cordis amore

5

Affectuque pio divinas promere laudes

Vrbe Viennensi curarem, mox ego raptus

Mentis in excessu iuxta me prepete cursu

Agmina spirituum tetrorum currere vidi,

Quos ad Aquisgranum cognovi tendere. Qui cum

10

Me pertransissent, revoluto lumine vidi

Ethiopem quendam lenta gravitate sequentem

Illos. Cui dixi: "Quo tendere vultis?" At ille

Dixit: "Aquisgranum." Respondi: "Qua ratione?"

Qui dixit: "Causam si vis cognoscere, dicam:

15

Vt Karoli regis animam nuper morituri,

Sicut speramus, dampnandam morte perhenni,

Ad Stigias flammas ex nostro iure trahamus."

Talibus auditis dixi: "Spurcissime demon,

Per dominum Christum pro nobis in cruce passum

20

Te nunc adiurans adiuro firmiter, ut, cum

Hoc iter arreptum compleveris, ipse redire

Ad me non renuas." Hiis dictis protinus ivit.

Post modicum tempus rediit spurcissimus ille

Demon, demonibus aliis comitatus, et ipsum

25

Alloquor hec dicens: "Quid vos egistis?" At ille

Flebiliter michi respondit dicens: "Maledictus

Iacobus, Herodis gladio truncatus, ad eius

Mortem devenit et in uno pondere pensans

Tot bona, que Karolus fecit, dum viveret, et tot

30

Ecclesias, tantos lapides, tot basilicarum

Ligna superposuit, quod plus appendere vidi

Tot bona plura malis. Animam mox Iacobus eius

Nobis eripuit et secum detulit illam."

Hiis ita finitis demon disparuit ille.

35

Mox ego cognovi, quod ab huius carcere vite

Migrasset Karolus et carnis mole solutus

Debita nature solvisset, eumque beatus

Iacobus ad celos cum magna laude tulisset.

Nam fuit inter nos convencio talis, ut ipse,

40

Debita nature si primum solveret, omni

Causa postposita michi tempus mortis et horam

Declarare sue statim properaret; et ipsi

Hora mee mortis me declarante pateret.

At Karolus cum se perspexit pondere morbi

45

Oppressum graviter, cuidam precepit alumpno

Ille suo, dicens: "Cum me cognoveris esse

Defunctum, propera Torpino tempus et horam

Declarare mee mortis." Cur pluribus utar?

Post Karoli regis mortem ter quinque dierum

50

Transacto spacio Karoli predictus alumpnus

Nuncius adveniens michi declaravit obisse

Francorum regem Karolum, multoque dolore

Continue febris vexatum tempore multo.

Cum Karolus mortis sompnum suscepit, ab anno

55

Christi nascentis octingentesimus annus

Et quartus decimus iamiam defluxerat, in quo

Celum pro terra, vitam pro morte recepit.

Sol et luna modo miro quasi compacientes

Abscondere suos radios, septemque dierum

60

Continuo spacio nigrum tenuere colorem.

Cuius nomen, id est Karolus princeps, quod honeste

Depictum fuerat in prima fronte beate

Virginis ecclesie, nullo delente lituram

Sustinuit; necnon et pertulit ipsa ruinam

65

Porticus ecclesie. Pons quidam ligneus ipse

Corruit in Reni fluvium, quem fecerat idem

Rex Karolus, per se consumptus funditus igne.

Dumque die quadam Karolus procederet, atra

Est effecta dies subito, lumenque diurnum

70

Vertitur in tenebras, et mox globus igneus ingens

Ante suos oculos a dextra parte recurrens

Transiit ad levam. Quo viso protinus ipse

Territus efficitur, multoque timore repletus

Corruit in terram. Tunc occurrere clientes

75

Atque sui comites collapsum suscipientes.

Et quia pro Christo tot verbera, totque dolores,

Tot mala, tot plagas, tot pertulit ipse labores,

Et quia tot sacras pro Christi nomine structas

Ecclesias Karolus fundari iussit et ipsas

80

Gemmis, argento ditavit, rebus et auro,

Libris et multis preciosis vestibus, inde

Egregius martyr vivit nunc et sine fine

Vivet, et in celo celestibus adsociatus

Civibus exultat, factus sine fine beatus.