Manet ante ostium Deus ulcionum,

Iudex vibrat gladium, tuba reddit sonum,

Vocat in iudicium vates visionum

Dare iustis premium, pravum reis donum.

5

In furore Dominus orbem nunc flagellat,

Dum iratus eminus Tartarum appellat,

Peccatoris facinus puniat vel pellat,

In tartara protinus duros hinc expellat.

Ab extremis finibus api sibilavit,

10

Ad stimulum plebibus muscam preparavit,

Que obsitis sepibus valles occupavit,

Consumptis segetibus speciosa pavit.

Tartarus a tartaro,

Averni claustro barbaro,

15

Plutonis fert insignia,

Per que necat tot milia.

Reges, regna, populos ense curvo stravit,

Parvos, magnos, dominos crucians necavit,

Sacerdotes inclitos passim trucidavit,

20

Moniales, monachos, sacra prophanavit.

Pannoniam, Hungariam, Ruscyam,

Poloniam, Arabiam, Turchyam

Vastans, Persidam, Mediam, Gorgyam

Dedit lugubrem semitam et viam.

25

Orbis partes geminas sibi iam subiecit,

Homines et feminas victos interfecit,

Ad vadandum flumina coria coniecit,

Vtrium subsellia ad natandum fecit.

Coccitus dulcis glareis

30

Currens cum Stigis flammeis

Produxit istos Ciclopes,

Indos, Mauros, Etyopes.

Tartarus istos vomuit,

Infernus partu crepuit,

35

Contra orbem intonuit,

Vt furerent, hos docuit.

Tartarorum gens brutalis,

Spurca, trucis, cruentalis,

Vrsa, pardus et leena,

40

Carnes vorat ut hyena.

Pulmentum, panes, legumina

Non coquit, potum dant flumina,

Sed sanguis pro vino sumitur,

Paratu brevi sic vivitur.

45

Hec gens cruoris bibula

Sitit semper ut situla;

Levis, ferox, incredula,

Fugit, redit ut damula.

Equorum greges nutriunt, qui dominum sequntur,

50

Docti bellis inserviunt, parati obsecuntur;

Stricto marti se ingerunt, dominum circumdantes;

Tesauros istos congerunt, talibus habundantes.

Est silex equi ungula,

Ferri, clavi non gerula.

55

Radices sunt his pabula

Terra vasta et gramula.

Arcus tendit plus quam gentes,

Longe ferit resistentes,

Necat omnes fugientes,

60

Parvos, magnos et potentes.

In sagitta preacuta

Torax perit, cedunt scuta.

Frendit, furit gens irsuta;

Nulla virtus manet tuta,

65

Limata gestit iacula,

Ignita portat spicula.

Sagitte volant eminus

Sue, sed nostre cominus.

Sue, non nostre sauciant,

70

Cum longe nostris iaciant.

More Parthorum feriunt,

Sagittas post se iaciunt.

Vt vir sagittat, equitat

Femina, ferit, militat.

75

Ipsa ut vir iugulat, spoliat, predatur,

Lupa vorax ululat, rapida venatur.

Sagitta iacens Tartarus, lancea prostratus,

Non servat fidem barbarus hostibus prelatus.

Armis de cocto corio

80

Se muniunt in prelio.

Nec sagitta resiliens

Ledit nec ensis feriens.

Omni arte fraudium arces fortes capit,

Fide fracta omnium vitam sitit, rapit.

85

Fortis arte, sed non situ municio ridetur,

Aggeribus et machinis in girum obsidetur;

Cum capitur, prosternitur, ne posteris servetura.

Sic incola et advena extinguitur, deletur.

Sed servant ex his omnibus electam iuventutem;

90

Que fortiter si dimicat, non efferunt virtutem.

Preit; si cedat, ceditur; non amant servitutem,

Nec virginem, quam violant, post servant ad salutem.

Decurio, centurio, pentarcus,

Dux, miles, procer, comes, cyliarcus,

95

Cohors. falanx, legio, exarcus,

Stat, pugnat, silet: imperat monarcus.

Precursorum milia currunt, paucos ledunt.

Que secuntur media claudunt, sic procedunt.

Dum subito preveniunt, et securos reddunt,

100

Ne fugiant, effugiunt, nulli omnes cedunt.

Est curruum, currilium

Velut tempestas imbrium,

Inundans ut diluvium

Currencium torrencium

105

De montibus in planum.

Collegium prophanum

Vt tigrium et dencium

Feralium mordencium,

Scindencium, fundencium

110

Sanguinem humanum

Vt pecudum, ut canum.

Hoc prelium insanum

Est gencium fremencium,

Pugnancium, cedencium,

115

Necancium tot milium

Hominum in vanum,

Iuvenem et canum.

Dum celum tonat, fulgurat, mittit contra celum

Sagittas, pelli murmurat fulgur propter telum.

120

Celum celi domino, ei terra cedit

In sue sortis termino, gens misella credit.

Quam plurimi continuis congressibus se cedunt,

Incendiis et spoliis ad invicem se ledunt.

Heretici apercius, securius incedunt,

125

Scismatici, apostate iudicium non credunt.

Hec sunt quadricornua orbem ventilancia,

Scindunt corda fatua, pactum faciencia

Cum morte perpetua zabuli versucia,

Acherontis pascua colent cum tristicia.

130

Fabri quatuor parantur,

Ad terrendum isti dantur,

Christi vestibus ornantur,

Armis lucis induantur.

Vt ab ira imminente,

135

A furore irruente

Liberemur, nunc repente

Convertamur tota mente

Ad clementem Dominum,

Qui est pater luminum,

140

Tergens noxas criminum,

Maculas peccaminum.