1

Salve, caput cruentatum,

Totum spinis coronatum,

Conquassatum, vulneratum,

Arundine verberatum,

Facie sputis illita.

Salve, cuius dulcis vultus,

Immutatus et incultus,

Immutavit suum florem,

Totus versus in pallorem

Quem [...] coeli curia.

2

Omnis vigor atque viror

Hinc recessit, non admiror,

Mors apparet in aspectu

Totus pendens in defectu,

Attritus aegra macie.

Sic affectus, sic despectus,

Propter me sic interfectus,

Peccatori tam indigno

Cum amoris intersigno

Appare clara facie.

3

In hac tua passione,

Me agnosce, pastor bone,

Cuius sumpsi mel ex ore,

Haustum lactis cum dulcore,

Prae omnibus deliciis.

Non me reum asperneris,

Nec indignum dedigneris,

Morte tibi iam vicina,

Tuum caput hic inclina,

In meis pausa brachiis.

4

Tuae sanctae passioni

Me gauderem interponi,

In hac cruce tecum mori:

Praesta crucis amatori,

Sub cruce tua moriar.

Morti tuae tam amarae

Grates ago, Iesu chare;

Qui es clemens, pie Deus,

Fac quod petit tuus reus,

Vt absque te non finiar.

5

Dum me mori est necesse,

Noli mihi tunc deesse;

In tremenda mortis hora

Veni, Iesu, absque mora,

Tuere me et libera.

Cum me iubes emigrare,

Iesu chare, tunc appare:

O amator amplectende,

Temetipsum tunc ostende

In cruce salutifera.