Quomodo primum convenimus

Sol radium fervens medium dum scandit olimpi,

      Fessus pernimium membra thoro posui.

Ostia clauduntur, non clauditur una fenestra,

      Que placido vento pervia sola foret.

5

Curas postpono, quoniam dormire volebam,

      Sed Veneris flamma torqueor ipse nimis.

Dumque nimis crucior satis alto vulnere lesus,

      Ianua cum digito tacta parum sonuit.

Illico surrexi cupiens decernere, quis sit,

10

      Ostia tam leviter qui digito tetigit.

Cumque manu clausus valvas aperire volebam,

      Fregit poste seram protinus ipsa Venus.

Venerat illius conductu pulcra puella,

      Hoscula mille modis que mihi cara daret.

15

Flora sibi nomen, quia florida sunt sua facta,

      Gutture mella gerens, mellea verba dedit.

Cuius crus tenerum tenui, quod non negat ipsa,

      Insuper et coxas sponte sua tetigi.

Nec venit niveas post me tractare papillas,

20

      Quas tractare mihi dulce nimis fuerat.

Venimus ad lectum, conectimur insimul ambo;

      Cetera, que licuit sumere, non piguit.

Hanc igitur cupio felicem vivere semper,

      Hoc tamen addendo: vivat ut ipsa mihi.