Ante chaos, iurgium indigestae molis,

Adhuc hyle gravida foetu magnae prolis

Nondum orto lumine lunae neque solis.

Nec discretis aere, terra, mari, polis;

5

In noy, in serie rerum mundanarum

Provide disposuit dator gratiarum

Sub pressura gravium honorem curarum,

Post laborem requiem dulce post amarum.

Seth Abel lugentibus est levamen natus;

10

Raptus Henoch requie curas est solatus;

Post Hur, post chaldaicos exul cruciatus,

Abram in spe seminis stellis est aequatus.

Post, Agar ludibrium, Sarae natus datur:

Post Lyam, ad libitum Iacob uxoratur;

15

Ioseph, luens somnium male dum tractatur

Post malorum cumulum, orbi principatur.

Pressis, Iacob filiis iugo Pharaonis

Patria promissa est repromissionis;

Multus in periculis, maior fit in donis

20

Magnus ille rex David, pater Salomonis.

Iob, in damnis unicus vas abiectionis.

Postne carmen cecinit duplis auctus bonis?

Qui nos aquis gratiae lavit a peccatis

Palmis, costa, pedibus, in cruce foratis,

25

Regno nos restituit; sed, his praelibatis,

Piscem assum editis, si mel praenotatis.

Sermo est Gregorii, vox moralitatis:

Praeit calix culmina; crux, spem maiestatis.

Culmina per calicis meruit amara

30

Thomas, honor praesulum, gemma Deo cara;

Nox in lucem claruit, lux tam clara rara,

Parens novi gaudii contra spem sit Sara.

Vae! et carmen praetuli; volo Vae praeire,

Vicem secus carminis carmen vocis dirae;

35

Sequor morem comici, scio vos hunc scire,

Primum Vae et tristia, post Evax! et lyrae.

Iam in navi mystica Thomas, nauta imus,

Quam iactabant flumina, quam premebat limus,

Cuius clamor: Domine, salva nos, perimus;

40

Reos premens, reis fit foetor, fex et fimus

Zelo domus Domini, zeli dux accensus,

Iuris est funiculo iura Dei mensus;

Hinc offensus furor est; institit offensus,

Vt vel iustus diffluat, vel ruat intensus.

45

Rus Ammonis dicitur mansio regalis;

Plaga rus cognominat septentrionalis;

Struxit hic consilium concilio feralis;

Hic cum christo Domini fit conflictus talis.

Rixis, probris, minis est publice pulsatus;

50

Mitem furor impetit, ut Ihesum Pilatus;

Non tacet, non titubat, non est immutatus;

Non est ante Baalim timide curvatus.

Cum Naboth legitime mente stabilita,

Perdam, ait, potius vineam cum vita,

55

Quam in hortum olerum sit, me dante, trita

Et tutando vineam, stat armatus ita.

Cum Iob patientia membris loricatis,

Scutum sibi praetulit bonae voluntatis:

Munit illum lancea longanimitatis,

60

Cassis spei, gladius verbi veritatis.

Armis fida talibus, ut perterrens leo:

Nil leonis tumidi nil laevum in eo,

Solum id conaminis in hoc nazareno:

Mori sive vivere non offenso Deo.

65

Stat in petra firmiter firmi fundamenti;

Infirmare nequid hunc fluctus vis vel venti,

Deest pallor vultui, deest timor menti;

Danieli comes est feras non timenti.

Vt in agnum irruant lupi circumfusi,

70

Tractant de legifero, legibus abusi;

Sed nox patrem liberat, tutrix interclusi;

Verberantur aerem, vana spe delusi.

Ne augmentat scandalum maior angaria.

Se consulte transtulit fugae, fultus via.

75

Implens ewagelium et praecepta dia,

Et furori regio cedens cum Helya.

Sic Saulis lanceam fugit Manufortis,

Sic Iacob iniurias avidi consortis

Sic a fera pessima, Puer magne. fortis,

80

Tu, Ioseph, ereptus es, auctus hora mortis

Exit lucis angelus ab Anglorum metis,

Iura sanctuarii linquens tapezetis,

Lupis oves, medicis aegros indiscretis,

Fractae ratis regimen flatibus et fretis.

85

Ad hunc lucis exitum cessit vitae vena;

Ad rapinam Sathanas lupis laxat frena;

Oves et ovilia duplex premit poena,

Iugo subdens servitus et vorax crumena.

Sanctum datur canibus; scurris damnatus.

90

In censura canonum, in re praesulatus;

Est cum sanctuario clerus confiscatus;

Confiscatis omnibus, Bel non est pacatus.

Audit scelus sceleri furor effrenatus;

Suos iubet eici, nulli miseratus;

95

Exsulat cum lectulo languidus sublatus,

Anus cum edentula puer recens natus.

O vindictae novitas, novus modus irae!

Vectos cunis, lectulis, exsules abire;

Aegros, anus, parvulos prosequi; punire

100

Impotes immeritos; in eos saevire!

Mirum si impune vis, Deus, haec transire!

Mirum si tam cognita fas est re nescire!

Sic insontes abstulit filios Rachelis,

In bis Christum persequens. impius crudelis;

105

Sine fuso sanguine sine mortis telis,

Hi et hi parilibus questi sunt querelis.

Iob in Thoma genuit series malorum;

Et hic ventus turbinis, hic fraus Chaldaeorum,

Damnum hic familiae, damnum hic honorum;

110

Sed sub his non subiit lapsum labiorum.

Coelum et non animum mutat transmarinus;

Constans hic et alibi, magis et non minus,

Premit quicquid imprimit furor serpentinus,

In virtute viribus Herculis vicinus.

115

Crucem ferre Simoni sciens nil prodesse,

De vi votum efficit, velle de necesse;

Pressum palam cruciat cruces clam impressae;

Palam et clam studuit crucis cultor esse.

Rem mirandam refero rem horroris miri,

120

Sui me sic edocent, timeant mentiri!

Premi morte iugiter fuit vita viri;

Multis morte moestius esset sic puniri.

Noctis ei requies, somnus expers morae;

Hausta somni specie, preces mox in ore;

125

Fletu fessis oculis, genibus labore,

Auxit haec praeludia ludo graviore.

Quo quondam sub Iudaeae solo sociante,

Flagris clam affligitur, illo flagra dante;

Fit in sancto carnifex carnis sacrosanctae,

130

Scutica non virgulis equos edomante.

Libet in hac serie paululum morari;

Hanc amaritudinem dulce est profani;

Sentit quae nec sentiunt plures neque rari,

Nec sic solent indui nec sic flagellari.

135

Explens in canonico monachum, beatus

Veste se induerat utriusque status;

Sub bis est cilicio duplici sagatus;

Aptat hoc femoribus, vestit illo latus.

Ne fallacis gloriae trahat hunc ruina,

140

Lineis velaverat saga cilicina;

Sed dulcescit acriter haustum mel de spina,

Melle litus gladius et virosa vina.

His undatus omnibus vir virtutis tantae,

A ministro caeditur; sputica pulsante,

145

Scissa sunt flebiliter vitae patri sanctae

Collum, dorsum, humeri, nates, crura, plantae.

Esse studens victima partibus his totis,

Instat reus, innocens precibus et votes;

Parcit tandem artubus zelus hic zelotis,

150

Saepe tinctis sanguine, nunquam non aegrotis;

Aegris aegre parcitur, dirae dono dotis,

Post flagrorum ferulas sagis mox admotis.

Post tam levis ponderis roseos ornatus,

Mox in sagae cyclade loris est arctatus:

155

Aptat hoc femoribus, vestit illo latus;

Fronde fossam, lineis tegens cruciatus.

Reindutis splendidis, hoc exornans onus,

Talis suos latuit, vere latro bonus;

Iugis dum his institit annus fit, octonus,

160

Raro interstitium, raro rigor pronus.

Ad alternam requiem monet nos poeta;

Sal in sacrificiis exigit propheta,

Nec quid minus scriptum quam sunt indiscreta;

Par est homicidii, crux irrequieta.

165

Sanctus Thomas, baiulus virgae pastoralis,

Iugis his septennio praestitit in malis:

Quaeque nos crucifera, rara, non poenalis;

Ab his nocte libera testi principalis.

Non observans sabhatum ne sit sons et renus,

170

Vt sancta sanctificans verus sit hebraeus

Fit dies praecipuus ei iubeleus:

Et bis vacans et ab his differt tibi Deus.

Saepe tortor intulit, sistens a flagellis:

Homicidam fieri me, Pater, compellis;

175

Saepe lato frigidus, flebili rebellis,

Ipse se dissecuit. pius versipellis.

Si veraces sui sunt assertores, horum

Vera est quam refero series rigorum;

Vere rei seriem vere rem malorum

180

Longe pinxi parcius quam vox assertorum.

Mira sub his parcitas potus atque cibi,

Sed vetat varietas testium, id scribi;

Ne nil tamen exequar, se furando sibi

Turbis iungit eremum; stans hic, degens ibi.

185

Ad vos loquor, Praesules cardinales viri,

Quibus poena corporis mollibus vestiri,

Somnus longus, balneis saepe deliniri;

Hunc signatis merito meritis deliri.

Vini tot diluvia, massae tot ciborum,

190

Ventris cibi gravidi, ructus refertorum,

Merito vos meritis aequant confessorum;

Confessorum talium regnum est coelorum!

Facta superfluitas carmen qua curatis

Probat hunc cruciferum parem insensatis;

195

Sed si nefas reum est, fas res aequitatis;

Sapuit, desipuit; praeit, retro statit.

Virtus culmen contulit tempore priori,

Non humana gratia, neque iura fori;

Honor erat oneri culminis rectori;

200

Situs, munde vivere; carnis crux, honori.

Nunc novata tempora novum habent statum:

Merces novant graduum fora dignitatum;

Virtus expers pellitur; pompa fert primatum;

Genu flectit sanctitas; praesidet peccatum.

205

Affligebant praesules temporis prioris

Labor, virtus, habitus nimii rigoris;

Mortales angelici fecerant nitoris

Nitens mens interius, situs rigens foris.

Aevi nostri praesules lex haec ornat morum:

210

Mensae sumptus splendidus; habitus porcorum;

Votum opus sitiens, labor institorum;

O! quam grata sanctitas talium sanctorum!

Erat cura praesulum, tempore priorum,

Victu frui sobrio, salus subditorum;

215

Erat erga subditos prius rigor horum;

Dum stetit, dum institit, nil hic indecorum.

Aevi nostri praesules urit Evae cura;

Bursae, ventris, lateris, eis cura, iura;

Inest eis obvium cura satis dura,

220

Diffluens remissio, crux sine mensura.

Cathedram nunc Moysis regunt in pastores

Mensae, vanae gloriae, mammonae cultores;

Parcunt ad paralysim verbere tortores;

Vsus vitae devii, ductu didutores.

225

O! quam sensit dissona talibus vir talis!

Thomae tam pompaticis vita tam poenalis!

Eius cesset aemulus insultare malis!

Diem probat vespera; decus, dos finalis.

Longi tractu temporis te spirante, Thoma,

230

Nauseam terrigenis, superis aroma,

Aegrum deflens filium, aegra mater Roma,

Sedet veste lugubris et inculta coma.

Cum Edom indomito Iacob flens conflictum,

Pacem monens mutuam, increpat conflictum;

235

Edom prece, monitis, minis, non devictum

Vinxit aequo laxius matris maledictum.

Nolentes reverti cor induravere,

Pharaonis fraudibus, legibus megaerae,

Aspides de apibus, de tyrannis ferae,

240

Tetros in teterrimos mores mutavere.

Nati patres abdicant (o nefandum morem!);

Opem, aegri; pervium devii ductorem:

Grex, pastori dedecus spondens et angorem,

Iuramento celebri firmat hunc furorem.

245

Profanatur publice coelitum germanus;

Vir famosus fama fit iudice profanus;

Fit in fama, proditor, exlex christianus;

Exlex mecum talis sit quisque christianus!

Ipsi caeci principes, caecis conductores,

250

In hanc secum foveam miserunt minores;

De piis apostatas creant subversores,

Et fiunt, et faciunt ethnicis peiores.

Sic pugnabat Chanaan cum Israelita;

Sed sol risit nubilum, lutum margarita;

255

Sub tam grandi grandine, sub tam trita vita,

Scutum eius statuit urbs in monte sita.

Post tot zelos nata pax, non de pacis colo,

Patrem natis reddidit et natali solo;

Cum vox pacem resonat, et cor: pacem nolo;

260

Pax est ea picea sono pacta solo.

Aegras dat inducias latro viatori,

Sabulo vis turbinis, vis procellae flori;

Lupi cum ovicula ludus est dolori;

Vere lupus lusor est qui dat dolo mori.

265

Sic blanditus est Ioab suo successori,

Ferro manum applicans dum os iungit ori;

Sic conclusit Ismael fratri iuniori,

Ludens ad ludibrium, par persecutori.

Foedus inops fidei res est plena praelis;

270

Iter Caim cum Abel sub diversis zelis;

Male mulcent oscula quorum crux sub velis;

Male salus percutit melle litis telis.

Vt post Syrtes mittitur in Charybdim navis,

Vt laxatis laqueis invescatur avis;

275

Sic remisit exulem male pax suavis,

Miscens crucis poculum sub verborum favis.

Flatibus et fluctibus transitis tranquille,

Tutum portus impulit in latratus Scyllae;

Austris iunctis Boreae fit latratus ille,

280

Fluctuum diluvium haec pluerunt stillae.

Quidam terrae malleus, civis Aquilonis,

Venam solvit iurgii fons seditionis;

Inspiravit turbinem perturbationis,

Per quam odor anglicae foetet regionis.

285

Haesit ei, belliger contra virum sanctum,

Quidam de confinio choreae Gigantum;

Complex ei additur ex te, Trinovantum

Novans in cognomine saecularem cantum.

Hinc sunt sata semina, per quae turbo totus,

290

Per quae ventus turbinis est imis permotus,

Princeps ille sibilus, si sit nitro lotus,

Si sit rasus punice, non erit ignotus.

Extunc scelus ausa est militaris manus,

Quo eclipsim pertulit sol meridianus,

295

Quo in patre filius caede fit prophanus,

Quo in sacro secuit Christum christianus.

Solis in solemniis, feta solem stella,

Feta castis finibus et signata cella,

Quinta lux dum agitur, pacem turbant bella;

300

Festum, lamentatio; cantica, procella.

Cum sole sol occidit, sol cognatus solis;

His ornandus moribus, ille praeest polis,

Sed his rite raptus est, his prostratus dolis:

Quis dolus dolosior quam in patrem prolis?

305

Reprobantem reprobos, debitos ruinis,

Invaserunt praesulem litibus et minis

Bini bis, de finibus missi transmarinis;

Dedit haec sors provida nomina bis binis.

Tres sunt ii, Villicus, Thrax et Vrsi natus;

310

Vt sit tetras, tribus est Brito sociatus;

Vt sint ex re nomina, reddit hos reatus

Traces et mortiferos, ursos, bruti status.

Ab his dum impetitur, petitur patronus,

Vt, absolvens noxios, sit a bono pronus;

315

Papa quod imposuit ut deponat onus;

Si id mali egerit, malis erit bonus.

In sua metropolim, sede sua tentum

Impetit hoc incitans sibilus serpentum;

Sed in vanum incitant, sibilant in ventum,

320

Se commassant azymis expuens fermentum

Rite scelus ratus est lutum deaurare;

Chore, Dathan, Abiron iustis innormare,

Lazare, te mortuum vinclis extricare;

Veni foras prius, est post exvinculare.

325

Canonum in serie ius est regulare

Suos sibi praesules papa secundare;

Nemini quos implicat competit laxare,

Vt sit eius solvere cuius est ligare.

Frustra fessant milites praesul dum frustatur,

330

In ma de milicia, I in A mutatur;

Secum secans populum miles malignatur;

Non erit miliciis ante caedem satur.

Dum ad aram confluunt, aulae mutans sedem,

Cum suis subierat sanctam Sanctus aedem;

335

Sub Nerone Senecae novit hic mercedem,

Sub Herodis legibus novi vatis caedem,

Zachariae sub Ioa caedem et haeredem:

O felicem, Thoma, qui te huc tulit pedem!

Patrem non eriperet fratrum grex fidelis,

340

Ostium obstruxerat fisus his cautelis;

Obstans pater intulit, est in his tutelis

Persequens obsequium pietas crudelis.

Seram, Fratres, pellite cura cum rebelli;

Lex est hic vim perpetim, non vim vi repelli;

345

Non in domo Domini regar lege belli;

Non erit, me praeside, templum arx castelli.

Se passurum praedicans Ihesus probra gentis,

Sic errorem renuit Petri renitentis;

Thomae vox haec aemula vocis est sequentis:

350

Vade retro, Satana, carnis sunt quae sentis.

Imperat et impetrat patris vox severa;

Cedunt ostiarii, cedit pulsa sera;

Intrant canes Stygii, duce te, Megaera;

Hominum in specie, daemones revera.

355

Strictis intrant gladiis, efflant hunc furorem:

Hostem regni quaerimus, regis proditorem,

Thomam temerarium, perfidum pastorem;

Iamiam quem est meritus sentiet furorem.

Hic sum, ait legifer Satanae collegis,

360

Neque regno pestifer, nec saluti regis;

Thomas sum, dominici dictus pastor gregis,

Pro tutela perimi promptus sacrae legis.

Non a dolo dolus est talis alienus,

Quo in Christum irruit coetus dolo plenus;

365

Habet id quod legitur, hoc loquendi genus:

Ego sum quem quaeritis, Ihesus Nazarenus.

In meandi serie Ihesum imitatus,

Sere palam obtulit sponte propalatus,

Hic est Christus obvius, hic Iudae reatus,

370

Hic a magistratibus missus grex armatus.

Inhiant et ineunt scelus scelerati;

Membra caput lacerant; patrem necant nati,

Homicidae plurimi, uno viso pati,

Monachi, canonici, praesules, legati.

375

Res stupenda posteris, horror hac aetate!

Non arcentur gladii loci sanctitate;

Matrem orbant filii, trucidato patre;

In matre perimitur frater a confratre.

In macellum area vertitur altaris;

380

In altaris area ruit lux solaris;

Quinque passus impetus ensis militaris,

Tortus est dominici prelo torcularis.

Vulnerum in numero formam fert Messiae:

Situ fert martyrii formam Zachariae;

385

Thomas Thomae Dydimae par est, fati die

Quintum habet hunc et hunc partus matris piae.

Ferarum foliis fuso iam cruore,

Cerebrum diffunditur inhumano more;

Arae vernat area candido rubore,

390

Tanquam ortus liliis roseo cum flore.

Nato Christo, iustus est propter Christum stratus;

Coelitus cum Stephano, cum Iohanne natus;

Dignus Dei gratia digne decoratus,

Et cum Innocentibus innocens litatus.

395

Ensem hic, tu asciam, sancte Dionysi

Passi poena simili verticis abscisi;

Pares rosas additis orto paradysi;

Estis pari pretio pares milui visi!

Aequant se Parisius urbs Dorobernensis

400

Dum securis seriem aemulatur ensis;

Geminum praepucium nullis par impensis!

Oh! quam gratis gratum est supernorum mensis!

Pastor dum percutitur, sparse sunt ovile;

Vt se fuga liberet fugit hic et ille;

405

Fletus fit in populo. clamant flentes mille;

Nostrae meta lucis est huius mors scintillae.

Mala malis cumulat Satanae satelles,

Praesulis post praesulem vellitur suppellex;

Thalamos et stabula vastant versipelles.

410

Cedi iunctis spoliis vix adhuc imbelles.

Mira miris persequor; manibus piorum

Procurato mortuo more mortuorum,

Vermes tot in vestibus visi sunt sagorum,

Vt sit caedes altera morsus tot tortorum.

415

Dicam quod hic sentio de hoc sacro reo:

Cauda iuncta capiti se libavit Deo;

Finem dum diffinio, dum per vitam meo,

Martyr est, me iudice, quaeque pars in eo.

Quid nunc agis, Moyses Deus, Pharaonis?

420

Vbi virga vigilans crux correptionis?

Manna si superfluit, vermes interponis;

Mannae virga socia normam dat patronis.

Ad radicem arboris ferrum non appones?

Blande terret tonitrus sibilo si tones:

425

In Ophni et Phinees, Pie, pius non es,

Hely, sine verbere si tam reos mones.

Sed in coelum ponere vereor os meum

Neque rerum denoto Pharaonis Deum;

Eos reos iudico dehortantes eum,

430

Filios sanguisuge qui sic ornant reum.

Vere, Roma, nimis est; eris sitibunda

Vorax, irreplebilis, inferis secunda.

Non et est? praeposterat lucri spe iocunda,

Probos censet reprobos et immunda munda.

435

Dudum terras domuit, domina terrarum,

Colla premens plebium, tribuum, linguarum;

Nunc his colla subiicit spe pecuniarum;

Aeris fit idolatra dux christicolarum.

Romae, si tu reus es, vis absolvi? prome;

440

Aes, ut sumas veniam, in os eius vome:

Prece sancti nummuli perorante pro me,

Si blasphemus fuero, mox placebo Romae.

Si te Roma reputat parricidam, moechum,

Symonis apostatae cor habeto caecum;

445

Fer argenti lilia, rosas auri tecum:

Hi di sacrant reprobos, scelus reddunt aequum.

Res est et non fabula, rata res et non vana,

Forum est venabulum curia romana;

Reis vendit veniam, approbans profana,

450

Vt in forum venditur lutum sine lana.

Insons Thomas caesus est; Roma, quid egisti?

Cedis in artifices; fratres Antichristi

Emunt male veniam, peius vendidisti;

Lis est haec sub iudice ante thronum Christi.

455

Manus, pedes, labia, si lavet Pilatus,

Per salutem Caesaris mundum se testatus;

Si per astra Lucifer iuret adiuratus,

Non haec reos expiant, non delent reatus.

Quod tam pii facti sunt in auctores rei,

460

Quod rodendo mortuum necdum parcant ei,

Nota loquor, denotant nota notus mei:

Lis est haec sub iudice ante thronum Dei.

Morem sequor comici; malis finem pono,

Flebile principium fine mutans bono;

465

Lyra mutat elogus dulci plaudens sono,

Thomas sedem carceris celso mutat throno.

Ver proscripsit hyemem, flores paruere;

Cetus quem sorbuerat vivit Ionas vere;

Nostra sentit Ninive Ionam reflorere,

470

Vae vertentem in evax, fletum in gaudere.

Ionae iungit foedera Thomas col... oinus

Quem livoris sorbuit furor belluinus;

Iam in tuto residens, iam Deo vicinus,

Implet Dei laudibus terrae nostrae sinus.

475

Vicit Cantuaria Montem Pessulanum;

Victa Salernia iactant se in vanum;

Thomas, novus medicus, dum apponit manum,

Signans insanabilem, mox resignat sanum.

Nova viri gratia digna recenseri,

480

Vivum nunquam medicum mortuum mederi;

Facit mors cum medicis operam deleri,

Facit hunc mors medicum, meta dat augeri.

Non haec subest physica poenis doctrinae,

Neque pulsum contulit, neque vas urinae;

485

Non est opus hominum modus medicinae,

Medicinae modus est opus vis divinae.

Thomas prelo proficit, incipit finitus;

Vivere vivit mortuus signis insignitus,

Qui Cantuariae miros novat ritus;

490

Fit hic gustu dulcium paradysi situs.

Hic novavit vetera paradysi iura;

Novus eius fluvius nostra rigans rura;

Hic lechitus olei vasa poscens plura;

Hic ubertas olei stat non defectura.

495

Hic effectu multiplex manna, coeli panis;

Hic emundas Naamam fluvius Iordanis,

Hic incolis Syloe salus male sanis,

Lumen coecitatibus conferens humanis.

Donum Petri datur hic claudo spem habenti,

500

Donum dono ditius auro vel argenti;

Hic dat Potens effeta loqui, non loquenti;

Surdus audit; effluunt morbi virulenti.

Hic est furta retegens novi ars sophistae;

Hic insanos lenies cithara psalmistae;

505

Hic das vitam mortuis, vitae dator Christe;

Hic ad Thomae gloriam pellis omne triste.

Hic descensus Angeli; hic est aquae motus;

Hic datur salutifer aquae mixtae potus;

Hic est quo spem refovent notus et ignotus,

510

Cum insomnia somnians, astans et remotus.

Sortitus rudiculum, iam fit sermo ratus,

Romae Cantuariam aequant commeatus:

Est in Thoma supplice Iacobitate status,

Conchis his vasculis remeat ornatus.

515

Ecce fera pessima Ioseph ille stratus,

Ecce vivit mortuus, statim dominatus;

Ecce quem submerserat olim, enatatus;

Ecce quem damnaveras, martyr est beatus!

Martyr, praesul, monache, flos canonicorum,

520

Voti compos, medice Thoma, spes Anglorum,

Vitam nostram statuens pio statu morum,

Nos post mortem munere munera piorum!

Prece tua precibus annuens quorum,

Praestet id quod petimus regni rex coelorum!

525

Amen, amen amen.