Est Beroe rerum scabies, faex livida, vultu

      Horrida, Naturae desipientis opus,

Altera Tesiphone, confusio publica, larvae

      Consona, conspectu sordida, tabe gravis,

5

Corpore terribilis, contactu foeda, quietas

      Cervicis scabies non sinit esse manus.

Dum latitat scabies rigido servata galero,

      Debita deesse sibi pabula musca dolet.

Pelle, pilis caput est nudum, ferrugo rigescit

10

      Fronte minax, turpis, lurida, sorde fluens.

Silva supercilii protenditur hispida, sordem

      Castigat, fruticis obice claudit iter.

Triste supercilium tabes retinere laborat

      Cervicis, nares progrediendo tegit.

15

Auris sorde fluit, non orbiculata redundat

      Vermibus, huc illuc pendet obesa madens.

Livescunt oculi, sanies decurrit, inundat

      Fluxus, lippa regit lumina, faece replet.

Dum volitant avidae circum sua pascua muscae,

20

      Palpebra fiscatas muscipulare solet.

Naris sima iacet, foetens, obliqua meatu

      Distorto, flamen exitiale vomit.

Proxima labra madent, fluxus distillat et aegrum

      Naris ad hospitium pendula spuma redit.

25

In rugas crispata riget gena foeda, lituris

      Obsita, quas oculus tabe fluente notat.

Pendula pallescunt et marcida labra, saliva

      Cerberei rictus stercorat aegra sinus.

In dentes rubigo furit, quos spiritus aeger

30

      Et tineae duplici perditione premunt.

Non parcit scabies collo vicina, quod horret

      Nodis, quod sordet ulcere, tabe natat.

Venis distrahitur pectus simulatque mamillas

      Consona vesicae panniculosa cutis.

35

Livida costarum macies exire videtur;

      Pellis conqueritur carnis egere latus.

Turgescit stomachus scabie, quam proxima Lethe

      Suscitat, inferni ianua, triste Chaos.

Gibbi pernicies staturam contrahit, ergo

40

      Inscriptus breviter terga tumere facit.

Emeritis hirsuta pilis hiat olla lacunae

      Consona, sulphurei gurgitis unda rubet.

Sentibus horrescit descensus ad ilia, latrat

      Cerberus, exundat faece lacuna patens.

45

Est genuum compago rigens, imbuta fuenti

      Diluvio, spargi se Flegetonte dolet.

Tibia vermescit scabie, cogitque ciragra

      Reciprocos digitos esse podagra pedes.