Marcia praeradiat virtutum dote, redundat

      Morum deliciis, religione praeit.

Matronale decus exemplo suscitat, expers

      Fastus, incestus nescia, pura dolis.

5

Dotibus innumeris est picturata, modesta

      Verbo, consilio provida, mente virens.

Lascivos reprimit motus, descire laborat

      Naturam, sexus immemor esse studet.

Mollitiem sexus solidat, fraudesque relegans

10

      Femineas redolet mente fideque nitet.

Visitat infirmam naturam gratia morum;

      Innatum mulier exuit ausa malum.

Est mulier non re, sed nomine; mens epithetum

      Naturae refugit evacuatque dolum.

15

Praedicat oris honor pretium virtutis, honesti

      Propositi vultus esse propheta potest.

Non mentis levitas monet esse noverca pudoris,

      Sed matronali disputat ore rigor.

Silva supercilii mentisque modestia signa

20

      Praetendunt mentis expositiva sacrae.

Non favor intuitus Veneris suspirat ad usum,

      Non circumloquitur mobilitate stuprum.

Marcia mente potens vitium captivat et aegrum

      In melius sexum degenerare facit.

25

Mentitur levitas sexum nucleique saporem

      Dissimulat facies perniciosa nucis.

Vasis pernicies spirat virtutis honorem,

      Pullulat in taxi cortice mellis odor.

Taxus mellificat, redolet mellita cicuta

30

      Dum viget in fragili pectore firma fides.

Res nova, vernat hiems, cornix albescit, acetum

      Dat nectar, taxus mella, myrica rosas.

Marcia femineum sexum festivat, honestat

      Naturam, taxum mellificare facit.

35

Increpat innatum facinus, nec inertia sexus

      Legat in exilium spirituale decus.

Cum nuce rixatur nuclei praestantia, pugnant

      Aegra superficies interiorque favus.

Marcia fraude carens, pia, casta, modesta, stupescit

40

      Oppositis sexum conciliare bonis.

Tot dotes solidat custos patientia, nutrix

      Morum, virtutis deliciosa comes.

Iusto iusta, sacro sacra, digna Catone Catonis

      Marcia promeruit intumulata legi.