Pauperat artificis Naturae dona venustas

      Tindaridis, formae flosculus, oris honor.

Humanam faciem fastidit forma, decoris

      Prodiga, siderea gratuitate nitens.

5

Nescia forma paris, odii praeconia, laudes

      Iudicis invidiae promeruisse potest.

Auro respondet coma, non replicata magistro

      Nodo, descensu liberiore iacet;

Dispensare iubar humeris permissa decorem

10

      Explicat et melius dispatiata placet.

Pagina frontis habet quasi verba faventis, inescat

      Visus, nequitiae nescia, labe carens.

Nigra, supercilia via lactea separat, arcus

      Dividui prohibent luxuriare pilos.

15

Stellis praeradiant oculi Venerisque ministri

      Esse favorali simplicitate monent.

Candori socio rubor interfusus in ore

      Militat, a roseo flore tributa petens.

Non hospes colit ora color, nec purpura vultus

20

      Languescit, niveo disputat ore rubor.

Linea procedit naris non ausa iacere

      Aut inconsulto luxuriare gradu.

Oris honor rosei suspirat ad oscula, risu

      Succincta modico lege labella tument.

25

Pendula ne fluitent, modico succincta tumore

      Plena dioneo melle labella rubent.

Dentes contendunt ebori, serieque retenta

      Ordinis esse pares in statione student.

Colla polita nivem certant superare, tumorem

30

      Increpat et lateri parca mamilla sedet.