Respondent ebori dentes, frons libera lacii,

      Colla nivi, stellis lumina, labra rosis.

Artatur laterum descensus ad ilia, donec

      Surgat ventriculo luxuriante tumor.

5

Proxima festivat loca cella pudoris, amica

      Naturae, Veneris deliciosa domus.

Quae latet in regno Veneris dulcedo saporis,

      Iudex contactus esse propheta potest.

Pes brevis, articuli directi, carnea crura,

10

      Nec vacua fluitat pelle polita manus.

Ne titulo careat species, sua dona maritant

      Corporeae dotes, effigiale bonum.

Materiae pretium, formae praestantia quaeque

      Membra relativa sedulitate beant.

15

Materiam picturat opus praedulce, venusto

      Materiae pretio materiata placent.

Non floris pretium marcescit turbine fastus

      Ceu parcat tenerae spina miserta rosae.

Haec facit ad Venerem, mihi tales eligo, tales

20

      Describit quales Windocinensis amat.

Hoc pretio Frigios laesit Ledea, rapina

      Priamidae, Troiae flamma, ruina ducum.

Cur hanc Priamides rapuit si Graecia quaerit,

      Illic Ypolitum pone, Priapus erit.