Naturae studium locus est, quo veris abundant

      Deliciae, veris gratia, veris opes.

Blanditur Natura loco, donando favoris

      Prodiga, donatis rebus egere potest.

5

Donandi transgressa modum, sibi nulla reservans,

      Purpurat ornatu floridiore locum.

Tellus luxuriat crinito gramine, gramen ...

      Comprimit et brevitas auris amica placet.

Non infestat aquas solis calor, immo teporem

10

      Ramorum series orbiculata fovet.

Humor, amicitiae solis sua iura maritans,

      Destinat in florum fructificare comas.

Altera gratuitas superest, cumulantque decorem

      Organicae studio garrulitatis aves.

15

Vociferans "occide", dolens philomena querelat

      Et sua iocundo damna dolore canit.

Vox merulae resonat, quae facta domestica nostrae

      Vocis adulterio nobilis esse solet.

Psittacus exclamat praesentatura triumphis

20

      Caesareis, lingua degenerante, "vale".

In scelus, in lites Tereus armatur. Alauda

      Laeta prophetanti, praecinit ore diem.

Argi luminibus stellatus pavo superbit

      Et picturatae vestis honore nitet.

25

Nidificat ramis Veneri sacrata columba,

      Incestum redimens simpliciore coma.

Turtur amica gemit primo viduata marito,

      Continuativi pignus amoris amans.

Hic canit, hic habitat maculis distincta coturnix,

30

      Et rigido perdix excrucianda veru.

Qui proprias canit exsequias, mortisque propinquae

      Despicit articulum, fonte resultat olor.

Materiam logici conflictus pica propinans

      Nescio quo medio membra colore tegit.

35

Direx nanus adest, qui staturae brevitatem

      Nominis intitulat nobilitate sui.

Non picus fabricator adest, cui fabrica rostrum,

      Dum sibi, dum sociis hospita tecta fodit.

Garrula nigrescit et avara monedula, sueta

40

      Exsilio nostros concelebrare lares.

Vel patitur vel agit passer, cui nomina ponit

      In lumbis fluitans irrequieta Venus.

Non cornix, non corvus adest, non noctua sacrum

      Blasphemat gemitus asperitate locum.

45

Non aquilae primatus adest, ne carmina plebis

      Rumpat regalis conditionis honor.

Ergo relativos volucrum querimonia cantus

      Dum movet, organicum carmen adesse putes.

Flos sapit, herba viret, parit arbor, fructus abundat,

50

      Garrit avis, rivus murmurat, aura tepet.

Voce placent volucres, umbra nemus, aura tepore,

      Fons potu, rivus murmure, flore solum.

Gratum murmur aquae, volucrum vox consona, florum

      Suavis odor, rivus frigidus, umbra tepens.

55

Sensus quinque loci praedicti gratia pascit,

      Si collative quaeque notata notes.

Vnda iuvat tactum, gustum sapor, auris amica

      Est volucris, visus gratia, naris odor.

Non elementa vacant, quia tellus concipit, aer

60

      Blanditur, fervor suscitat, humor alit.

Praedicti sibi fontis aquam, sibi floris amicat

      Blanditias, genii virgo, studentis opus.