<>

1

      "Restituit sumptus fortis amica fides;

1a

Nam mihi diues amans loculos saciauit inanes,

      Milicieque mee premia larga dedit.

Ter latui latebrisque tribus tria funera fugi".

      De tribus ille duas explicat, una latet.

5

Dum lingua stolidum rerum uia ducit in archam

      Obuiat instanti prouida lingua malo.

Incautum bene cauta pedem pede tangit amica,

      Hoc uelut eloquio percipit ille suam.

Ergo rotam lingue mutato limite flectit

10

      Sic portu uiso per leue ducit iter.

A sibi uicina reuocans sua uela caribdi

      Per placidam uerso remige ducit aquam.

Verbis uerba quidem non fictis ficta perite

      Addidit, ut ficti uelet imago fidem.

15

"Pons uitreus pontum complexus utrumque momordit

      Litus, in hunc ueni uitrea terga premens.

Parua fides uitri primum seruare rigorem

      Noluit, et rapide me sociauit aque.

Dum cecidi timuique cadens maduique cadendo,

20

      Deleuit subito sompnia nostra timor.

Sic mihi sompnus opes et sic mihi fecit

      ** aquam.

Hec dedit accedens, hec abstulit ipse recedens;

      Naufragium sensi letus abesse meum".

25

Sic laqueum laqueo, sic fraudem fraude redemit

      Miles, sic caruit perfida lingua fide.

Vindicat in ciuem germane crimina frater,

      Pugnis et pedibus uapulat ille miser.

Exilii pactus uitam mendicat inhertis,

30

      Exul abit, linquit plurima, pauca uehit.

Quos prius illeuit firmum bene gluten amoris,

      Firmius irretit firma cathena tori.

Primi non meminit domini domus ipsa, secundo

      Pene resultat hero, pene reclamat "aue".

35

Se uario flexu crispare superbia uocum

      Nititur, et pugnant non sine pace sonus.

Ianua crinitur ramis, clamis aurea murum

      Purpurat, ista suam uestis adornat acum.

Picta uelut uiuens oculo blanditur imago,

40

      Mille modis temptat uiuere pictus homo.

Hic est nauta Paris, hic raptor ibique maritus;

      Hinc arat, inde metit, possidet inde reus.

Hic Danaos fert ira duos, hic carbasa uentus,

      Hic Danais instans Troia superbit adhuc.

45

Illic Pergamei uenit calor igneus ignis,

      Hic fugit Eneas, est homo patris equus.

Est pia flamma, pio lambens sine uulnere parcit,

      Ne tepeat pietas intepet ipse calor.

Ningit in Ancisa torpentis bruma senecte,

50

      Ac ibi mirantur aurea fila niues.

Simplex Archadii barbam non cogitat etas,

      Palliat Enee leta iuuenta genas.

Fundit ubique suos auri lasciuia risus,

      Vix bene dignatur aurea uasa cibus.

55

Dum sua corpus habet, sua sunt conubia cordi,

      Illis uer animi nulla perurit hyemps.