Post metrice studium summe respirat alumnus

      Vindocinensis, opus officiale parat.

Officium commune reor, quod epistola prodit,

      Prodit in alternas reciprocata vices.

5

Cui muto licet ore loqui, que lactat amicos,

      Que tegit archanum, que sine voce rogat;

Que fedus refovet, ne dormitare favillis

      Letargi possit inveterata fides;

Qua duce mens loquitur, auditur qui tacet, absens

10

      Impetrat, aspirat gratia, vernat amor.

Stulticie mater est dissuetudo, noverca

      Doctrine, sensus exulis egra comes.

In studium vitam dispenso, tedia vite

      Votive redimo sedulitatis ope.

15

Venas quippe meas non hausit Milo nec Afra,

      Nec cum Lenticula Sucrio bella movens,

Non epigramma, patris auctorum cum sibi preesse

      Vindocinum stupuit Aurelianis hebes,

Nec metra rethorici conflictus, nec tibi cedens

20

      Carmine, Bache, meo cervisiana lues,

Nec Phedre monitus, nec qui ieiunus amoris

      Respuit Yppolitus zelotipare patrem,

Non Iovis incesti mugitus, nec sata Cadmi

      Ferrea, non hic et hec Hermafroditus homo,

25

Nec simulata Iovi Phebes essentia, vendens

      Parrasidi rigidum pro muliere marem,

Nec Baccis venerata deos, nec Biblidis ardor,

      Nec Stigio Cereris filia rapta Iovi,

Nec Tisbes gemitus, nec summula nuncia metri.

30

      Scematicum, livor si patiatur, opus.

Cetera mens reticet mea, ne pavone magistro

      Plume delicias enucleare ferar.

Parisius logicam sibi iactitet, Aurelianis

      Auctores: elegos Vindocinense solum.

35

Ad solitum suspiro metrum: desiderat hortum

      Hortulanus, eques prelia, mergus aquas.

Pascitur assiduis mea mens, ne langueat usus,

      Ne pereat nullo vomere tactus ager.

Mentis delicias labor hic non pauperat, immo

40

      Pullulat uberius particulata seges.

Nunc convertibilis scribetur epistula, voti

      Blanda relativi significata gerens.

Scriptis scripta, preces precibus pensantur, honore

      Missus honor, votis vota, salute salus.

45

Amplificatur honor alterno carmine, quippe

      Iusta relativo gaudet honore fides.

Si ruo, si pereo, veniam peto, cum gravitatis

      Tempto, sed adiuncte commoditatis, iter.

Principium sine principio, sine fine maritat

50

      Fini legitimo Vindocinense metrum.