Fidus ad ignotum suspirat amicus amicam,

      Vt novus alterna voce fruatur amor.

Me licet ignores, non dedigneris amicum:

      Nil nocet ignoti notificata fides.

5

Te canit et recinit insignis fama nec ullum

      Intitulat tanta nobilitate virum.

Parcior in reliquis laudis, tibi prodiga soli

      Humanum certat adpropriare decus.

Fame materiam tua dat prestantia, virtus

10

      Commodat, attribuit vita, propinat honor;

Se tibi dispensat virtutum concio, morum

      Flosculus, eloquii gratia, mentis opes.

Vt se iustitie pietas votiva maritet,

      Est intercessor inter utramque modus:

15

Castigat modus excessum te preside, fastum

      Simplicitas, litem gratia, iura dolos;

Discipulus socie rationis fraudis in usum

      Mentem, verba, manus luxuriare vetas;

Humanum precium precedis: celibe vita

20

      Nature fragilis inmemor esse potes.

Tot bona nulla lues violat: non mella cicuta,

      Non urtica rosam derosulare potest.

Consonat et redolet melius mixtura bonorum,

      Ceu melius spirant lilia mixta rosis;

25

Coniuga virtutis virtus conspirat odorem,

      Plenior accessu crescit honoris honor;

Cum precio precium prestat, cum lumine lumen;

      Gratior est flos cum flore, sapore sapor.

Tot bona me stimulant, mihi me furantur: honoris

30

      Predicti sitio proximitate frui,

Vt de mille rosis rosulam, de pectoris igne

      Igniculum, radium de radiante feram;

Vt de sole mihi detur scintillula lucis

      Solaris, mel de melle, nitore nitor.

35

Qualiacumque tibi metra lego tuique favoris

      Littera prelibat officiosa viam:

Te licet ignotum recolo nec fecit amoris

      Nostri primicias officiosa manus;

Est ingrata fides et non meritoria, cuius

40

      Preveniens meritum primiciavit iter.

Ad tua suspiro cupidus spectacula: pasci

      Deprecor intuitus gratuitate tui.

Te quasi celestem reor, in preconia cuius

      Fama fatigatur et vacuata stupet.

45

Hoc precor, hoc posco: ne dedigneris amicis

      Me licet ignotum connumerare tuis.

Crescat in inmensum congressus amoris: amici

      Nulla superfluitas federis esse potest.

Queso, vale, meme iubeas accedere, votum

50

      Voto contendas equiperare meum.