Gaude, que cunta transisti,

Cum celestis ostendisti

Nobis uite speculum;

Tu latoris es phicella

Noueque legis cistella,

Currus et uehiculum.

Gaude, imperatrix alma,

Que cum Dei sis agalma,

Nidulus et camera,

Fructu tuo uegetamur,

Vegetati ueneramur

Viscera Deifera.

Gaude, regnans pulcra tota,

Cuius nulla neui nota

Decorem deliliat,

Noui nouum musti crater,

Vera uirgo Dei mater,

Quam Venus non uiciat.

Gaude, crater, cuius mustum

Illum fidum, illum iustum

Petrum debriauerat,

Haustu cuius ausum nactus

Nouuus Dei preco factus

In uerba proruperat.

Gaude, fons, qui non arescit;

Tu flos es qui non marcessit,

Paradisi lilium;

Vas mellis e<s>, lactis uter,

Scaturigo, flumen, luter

Purgatiuus sordium.

Gaude, regina tonantem

Lacte nutriens infantem

Cingens scripta fascia;

Salue, semel, uale, rursum,

Que per carnem sistis cursum

Carnis ad decliuia.

Gaude, que dum preceps ruit

Et corrupte carnis fluit

Moles ad flagicia,

Vniendo carni Deum

Carnis aquam in lieum

Vertis uentris ydria.

Gaude, imperatrix, que nos

Mendicantes et egenos

Suscitans de puluere,

Nostrum nostra herum hera

Tu, sed alui salua sera

Meruisti parere.

Gaude lassis clinicorum,

Tu celeuma naufragorum,

Tu secunda tabula;

Tu lechitus es oliui,

Tu uitalis uia riui,

Dei breuigerula.

Gaude, porta procis clausa,

Salus egris, fessis pausa,

Flentibus tripudium,

Que nutantis es bacillus,

Tu Tonantis es puluillus

Et reclinatorium.

Gaude, pastoris magale,

Que fideles ad uitale

Minas oues pabulum;

Sabatismus fatigatis

Et morbosis sanitatis

Es electuarium.

Gaude, regnans, que pauenti

Pax es et fons sicienti,

Flenti facitergium;

Tu uirtutis es exemplum,

Domus Dei, Christi templum

Et gazophilacium.

Gaude, regnans gloriosa,

Cuius semper est rimosa

Manus indigentibus;

Tu lusco lux et claudo pes,

Erumnosis opem opes

Influis in opibus.

Gaude, regis summi cella,

Condens sub carnis umbella

Deitatis radium;

Imperatrix, Dei teca,

Per quam lippa ceca

Mens habet collirium.

Gaude, regnans, casa Dei,

Qua dolentis es Talia,

Pauperis refugium;

Imperatrix, Clio mestis,

Que canalis es celestis

Roris et impluuium.

Gaude, regnans, reuerenda,

Sine neuo, sine menda,

Luna sine cornibus;

Tu que praua sunt emenda,

Claudis gressum et lumen da

Cecis, risum tristibus.

Gaude, per quam sol saccatur,

Per quam Deus humanatur,

Per quam celum scanditur,

Per quam luctus limitatur,

Per quam dolor abelatur,

Per quam risus redditur.

Gaude, nostre spes, Maria,

Languorum cuntorum quia

Salutis confeccio

Qua languori subuenitur

Tui uentris inuenitur

In antidotario.

Gaude, imperatrix lenis,

Que dedisti calcem trenis,

Opem nobis tribue,

Et in huius uite salo

Naufragantes nos a malo

Tempestatis erue.

Gaude, regnans mater Christi,

Que pudore meruisti

Dici fenix uirginum;

Imperatrix, cuius fructus

Dedit nobis finem luctus

Et doloris terminum.

Gaude, cuius pia dextra

Sordentes intus et extra

Plene solet tergere,

Et absterso culpe ceno

Serenatos in sereno

Regno Dei ponere.

Gaude, fornax caritatis,

Clara cono castitatis,

Pulcra claris moribus;

Imperatrix, scema poli,

Quam nouercam habent soli

Qui iacent in sordibus.

Gaude, pelta peccatorum

Et asilum electorum,

Sed et refectorium,

Regnans sporta pane plena,

Christi clias, Iesus lena,

Dei dormitorium.

Gaude, regnans gloriosa,

Sola pregnans et uentrosa

Sine maris opere,

Firmamentum infirmorum,

Delens pondus peccatorum

Pio uentris honere.

Gaude, regnans cuius prole

Peccatores sunt a mole

Peccatorum liberi,

Que celos potenti palmo

Concludentem breuis almo

Valle uallas uteri.

Gaude, nectar uel medela,

Qua peccator a sequela

Peccati detergitur;

Mellis tui cataclismus

Salutaris est baptismus

Quo mundus abluitur.

Gaude, scopa qua purgatur

Et qua procul relegatur

Prima mundi feditas,

Per quam sertum circulatur

Dum nature copulatur

Vltime diuinitas.

Gaude, regnans, mundi uita,

Conca de qua margarita

Preciosa nascitur;

Miserere tuo seruo,

Qui peccati nexus neruo

Lente Deum sequitur.

Gaude, nam cum premit tremor

Et attendo quibus premor

Et quot malis sordeo,

Horum memor in spe nuto,

Memor tui te saluto

Et michi spem spondeo.

Gaude, celi breuis apis,

Que de Dei sinu capis,

Redolentem flosculum,

Et de flore facis fauum,

Gustu cuius ad octauum

Peruenitur seculum.

Gaude, regnans generosa,

Cuius gena radiosa

Rorans miscet liliis;

Terra ferax sine sulcis,

Fundens fructum, sed petulcis

Nunquam stricta brachiis.

Gaude, que candore cluis

Tanto, nobis seruis tuis

Clemens et propicia

Rumpe uiles Eue netus,

Ne nos saltus ille uetus

Arceat a gloria.

Gaude, mundi medicina,

Verbi uestis et uagina

Christi creditaria;

De sentina uiciorum

Nos ereptos angelorum

Cetibus associa.

Gaude, cuius pia prece

Peccatorum tersa fece

Rei gaudent uenia,

Quos confractis infernorum

Claustris transfer ad celorum

Stellata palacia.

Gaude, tellus ingrauata

Sed nec cissa nec sulcata

Rusticano uomere;

Capciones eius cassa

Qui nos hamo reti nassa

Nititur decipere.

Gaude, per quam surgunt hii qui

Ceciderunt per antiqui

Serpentis astuciam;

Tu draconem contriuisti,

Que de celis attraxisti

Deitatis pluuiam.

Gaude, uictrix hostis seui,

Claudens Deum claustro breui,

Paruo magnum meciens;

In frumentum carnis fenum

Vertis et in aurum cenum,

Verbo carnem uniens.

Gaude, imperans puella,

Que captiuos a phicella

Seruitutis liberas,

Et in lucis regione

Superato Pharaone

Superis collateras.

Gaude, regnans, lane floccum

Vertens in regalem coccum

Qui floccat et fulmina<t,>

Regina qua spoliatur

Carcer mortis et is datur

Qui mortem exterminat.

Gaude, regnans, cuius rore

Mundus ante flaccens flore

Rediuiuus nituit;

Imperatrix felix, aue,

Virgo cuius partus a ue

Mortis nos eripuit.

Gaude, regina, qua sospes

Fit morbosus tuus hospes,

Per quam exul remeat;

Imperatrix, qua subacta

Mors est multis que compacta

Soluit ne preualeat.

Gaude, regnans quam in armis

Christiani portis Martis

Inuocant terrentibus;

Imperatrix tam cordata

Per te salus profligata

Redditur credentibus.

Gaude, regnans, mortis frenum,

Plenum sed et semper plenum

Vite procuarium;

Imperatrix arcs timenti

Que uitalis es frumenti

Repletum granarium.

Gaude, per quam mors mordetur,

In qua tota continetur

Annona fidelium,

Quam qui celos fabricauit

Pro conclaui consecrauit

Ventrale palacium.

Gaude, regina cum prole,

Quam uidit amictam sole

Iohannes deiuidus,

Cuius plantis est substratus

Lune globus, ut prefatus

Asserit altuidus.

Gaude, uirgo puerpera,

Quam duodecim sidera

Coronant suo lumine,

Per que cuntis ostenderis

Quantum precellis ceteris

Ymperii regimine.

Gaude, quam in troni

Dignitate superponi

Voluit celicolis

Is qui frenat et aurigat

Raptum celi quibus ligat

Elementa cimbolis.

Gaude quam mentis excessus

Nostre laudat indefessus,

Matrem mundi luminis,

Palma, cedrus et cipressus

Sunt signa tui progressus

Exaltate uirginis.

Gaude, nubes que de mari

Videbaris eleuari

Vt uiri uestigium;

Tuus partus sine pari

Gaudet sede singulari,

Tu prima post filium.

Gaude, scandens per deserta,

Cincta rosis et operta

Liliis conuallium;

Seruis tuis fac miserta,

Porta celi quod aperta

Sit ad idem gaudium.