De meretrice

Fallacem caueat simplex ac corde dolosum.

Antiquus factus concurrens sermo per aures,

Femina quod quedam, meretrix non corpore casta,

Ardua famosi coluit iam menia castri.

5

Sic mecha en maculat uiuens sua membra, nefande

Vt iuuenes urbis uocitans ad turpia queque

Deciperet pellex multos iam dote recepto.

Nequiter infelix uixit cum tempore sero;

Ast iuuenem thalamis quendam, post, turpibus auxit,

10

Conubium illius cunctis ceu pulcrius esset,

Nec minus ad meretricem mente cupido retraxit.

Corporeis iuuenem succendens turpibus illum,

Femina tunc iterum prisco decarpitur igni,

Vnius thalamum nolens seruare mariti,

15

Plurima sed sequitur ueteris uestigia flamme,

Quodque cupido trahens illam, genitrixque camena

Flammigeris sequitur cupidis ac passibus ardens.

Non latet hoc iuuenem uisu sensuque refertum;

Sed meche cipridis nouit ceu facta secuta est.

20

Femina, sic uiuens, tandem post tempora sera

Fallaci promisit dicens hec corde marito:

Ceu Tyria ignifero dilexit pectore Dido

Dardanium Eneam regali stirpe creatum,

Oque decens coniux uestrum sic diligo uultum.

25

Tunc olli simili confert hec ore maritus:

O lux, cura, decus fulgens, es gloria nostra.

Viscere sic mea mens in te flammescit et imo,

Vt pastor quondam conflagrans ideus arsit,

Argolica furtim rapiens in coniuge raptor.

30

His iuuenis lepidis ludunt ac femina dictis;

Diludunt uerbis se fantes talibus ambo.