De aquila et testudine

Aquila, rex auium, nuper auolauit

Trans marina flumina; qui predam captauit

Et maris Testudinem ferox asportauit;

Sed Testudo tremens infra concham latitauit.

5

Aquila Testudinem uorare uolebat;

Sed concham nullatenus frangere ualebat.

De prope famelica Cornix accedebat,

Dicens quod predam preciosam valde gerebat.

Et respondit Aquila: Nil appreciatur

10

Preda quam sic predicas; nam concha uallatur.

Respondit Cornicula: Si pars michi datur,

Consilium capies, quo statim concha teratur

Totis, inquit, uiribus nitere uolare,

Et quo locum poteris petrosum spectare,

15

Choncham terre pro[i]ice, quam cum mox crepare

Videris, insiste predam pro uelle uorare.

Hic consiliarios notat prauitatis,

Qui peruertunt animos plenos pietatis:

Sepe bona facere boni uellent gratis,

20

Nec permittuntur pro consiliis sceleratis.