De furibus et eorum nupciis

Institerunt nupcias Fures celebrare;

Ad quos quidam sapiens cepit propinquare;

Quos ut uidit fertiles ciphis exultare,

Cepit adulari simul et problema notare:

5

Auscultate gaudia nobis nunciari:

Sol uxorem ducere, uolens procreari

Filios, proposuit; sed hinc indignari

Machina celestis cepit simul atque minari.

Sed, cum Sol propositum uellet declinare,

10

Tota celi machina cepit acclamare

Et Iouem conuiciis multis incrustare.

Iupiter iratus causam cepit rogitare.

Cui Solis propositum mox exposuerunt

Et se contradicere pariter promiserunt.

15

Inquisiuit Iupiter cur mote fuerunt.

Que sibi responsum tali sermone dederunt:

Si Sol estu nimis cuncta nunc cremabit,

Quid fiet cum filios ex se procreabit?

Hoc tibi prouerbium uetus conprobabit

20

Quod genitor prauus prolem nequam generabit.

Hec monet historia non communicari

Inpiis hominibus, sed abominari

Illorum consortium; nam uult insectari

Liuor uirtutes harumque bonus cruciari.