De leone, bubalo et lupo

Leo rex quadrupedum, qui dudum uenari

In siluis proposuit, cepit meditari

Quales sibi socios uellet sciscitari.

Tunc bubalumque Lupum sibi iusserat associari.

5

Hi tres strenuissimi siluas adierunt;

Mire magnitudinis ceruum prendiderunt;

Tunc lupus et Bubalus mutuo dixerunt

Qualiter hunc ceruum partiri proposuerunt

Tunc respondit Bubalus totum ius constare

10

Leonis arbitrio qui predam frustrare

Deberet, ad libitum partem cuique dare.

Tunc Leo iudicium sic est orsus recitare:

Michi prima porcio debet conseruari,

Quia rex sum pecorum; secundo donari

15

Quia ceruum prendidi; si quis asportari

Partem uult reliquam, sibi me sciat ille minari.

Tunc Lupus et Bubalus timidi steterunt:

Duro de iudicio, quod sic audierunt

Illi contradicere non ausi fuerunt,

20

Sed cunctas cerui partes sibi contribuerunt.

Hanc, fratres, historiam sic intelligatis

Vt cum fortioribus sortem non mittatis,

Qui nos prement iuribus, dum non habeatis

Qui uos defendant, et sic sine spe pereatis.