De stomaco ocioso

Fysice sciencia satis protestatur,

Quod sine cibario nullum sustentatur

Mundo ingens animo, quia uegetatur

Per uictum sanguis, anime quo uita locatur.

5

Ocioso Stomac[h]o, nuper indignati

Erant Manus et Pedes, negare parati

Cibos Ventri solitos; ociositati

Nam totus tribuit, nulli datus utilitati.

Demum cum se Stomac[h]us sentit ieiunare,

10

Cibum sup[p]lex postulat. At illi negare

Instant. Qui deficiens cepit egrotare,

Omnia menbra simul acri morbo cruciare.

Tandem menbra stomacho cibos prorexerunt;

Sumere non ualuit; hoc obstupuerunt.

15

Hic ieiunus interit; illa defecerunt:

Dum Ventrem macerant, pariter cum Ventre ruerunt.

Hic monet non spernere nostros adiutores,

Quamuis inpotentes sint et nos forciores;

Nam potest contingere, quod utiliores

20

Hi sunt quandoque, quos credimus esse minores.