De cane et asello

Murmuris et caude studio testatur amorem,

      Nunc lingua Catulus, nunc pede calcat Herum.

Gaudet Herus, comitque Canem, comitemque ciborum

      Efficit; alludit turba ministra Cani.

5

Arte pari, similesque iocos similemque fauorem

      Lucrari cupiens, inquit Asellus iners:

Me Catulo prefert uite nitor, utile tergum;

      Nec placeo fructu, sed placet iste iocis.

Ludam; lude, places. Sic ludi tempore uiso,

10

      Vt ludo placeat, ludit et instat Hero.

Blandiri putat ore tonans, humerisque priorum

      Pressis mole pedum, se putat esse pilum.

Clamat Herus; uult clamor opem; subit ordo clientum;

      Multa domat multo uerbere claua reum.

15

Quod natura negat, nemo feliciter audet:

      Displicet imprudens, unde placere putat.