De agno et lupo

Cvm grege barbato dum ludit iunior Agnus,

      Tendit in hunc menti dissona uerba Lupus:

Cur olidam sequeris munda plus matre Capellam?

      Lac tibi preberet dulcius ipsa parens.

5

Est prope, festina, matrem pete, munere matris

      Lac bibe; nam seruat ubera plena tibi.

Agnus ad hec: Pia Capra mihi lac dulce propinat;

      Me uice matris alit, me uice matris amat.

Non michi, sed domino prodest me uiuere; uiuo

10

      Vt metat in tergo uellera multa meo.

Ergo michi prestat nutriri lacte caprino,

      Quam lac matris habens mergar in ore tuo.

Omnes uincit opes securam ducere uitam,

      Pauperius nihil est quam miser usus opum.

15

Nil melius sano monitu, nil peius iniquo;

      Consilium sequitur certa ruina malum.