De leone et pastore

Sollicitus prede currit Leo: spina Leonem

      Vulnerat, offendit in pede mersa pedem.

Fit mora de cursu; leuitas improuida lapsum

      Sepe facit, leso stat pede turba pedum.

5

Vix egrum sinit ire dolor, saniemque fatetur;

      Maior idem loquitur uulneris ipse dolor.

Cum lesit miseros fortuna, medetur eisdem:

      Hoc est cur medicum plaga Leonis habet.

Nam Leo Pastorem reperit Pastorque Leoni

10

      Pro dape tendit opes; respuit ille dapem.

Supplicat, et plagam tenso pede monstrat, et illum

      Orat opem; Pastor uulnera soluit acu.

Exit cum sanie dolor, et [res] causa doloris;

      Hic blando medicam circuit ore manum.

15

Sospes abit, meritique notas in corde sigillat;

      Tempore deleri gratia firma nequit.

Hic Leo uincla subit, Romane gloria prede

      Hunc habet, et multas miscet arena feras.

Ecce necis potum Pastori culpa propinat;

20

      Clauditur in mediis et datur esca feris.

Hunc Leo presentit, petit hunc; timet ille, timenti

      Hec fera blanditur; sperat, abitque timor.

Nil feritatis habens ludit fera, cauda resultat;

      Dum fera mansuescit, se negat esse feram.

25

Hunc tenet, hunc lingit, pensatque salute salutem;

      Nulla sinit fieri uulnera, nulla facit.

Roma stupet, parcitque uiro parcitque Leoni:

      Hic redit insulas, et redit ille domum.

Non debet meritum turpis delere uetustas;

30

      Tempore deleri gratia firma nequit.