Ad Vesperas antiphonae

Vir domini prudens, meritorum luce refulgens,

Preclarus genere morumque micans probitate,

Tempore preclari fertur regis Nicolai

In lucem sanctus mundi prodisse Ketillus:

5

Sic pius ac mundus, ut ei quis in orbe secundus

Vix foret aut similis, in commissoque fidelis.

Mnam meruit domino multiplicare suo.

Vir pius ac iustus Verbique lucerna Ketillus

Munere multiplici meruit domino famulari:

10

Clarus honestate, rutilans mira bonitate,

Mitis, mansuetus, humilis, pius atque modestus

Induit algentes, satiauit et esurientes.

O felix Christi confessor, qui meruisti

Sic de terrenis largiri rebus egenis,

15

In permansura quo mutares peritura

Et felix fruereris eis per secla futura:

Splendida gemma patrum, virtute nitens meritorum,

Suscipe seruorum pia vota precesque tuorum

Et prece fer nobis veniam peccamine lapsis!

Hymnus

20

Alternatim sonent voces, et dulci concordia

Laudum melos regi regum concinat ecclesia,

Qui Ketillum immortali coronauit gloria!

Cuius nutu et virtute gubernantur omnia,

Hunc, electum sibi seruum ante mundi tempora,

25

Precognouit admiranda illustrandum gratia.

A diebus iuuentutis pium, castum, humilem

Presciebat, largum, mitem, charitate precluem

Et virtute meritorum iam inestimabilem.

Qui per signa adhuc viuens renitebat varia,

30

Nunc subuectus ad superna operatur plurima

Resplendetque cum electis in perhenni gloria.

Trino deo in personis, vni in substantia,

Summus honor, summa virtus, summa sit et gloria,

Cuius regnum et potestas per eterna secula! Amen.

Super Magnificat antiphona

35

Magnificet dominum votis et carmine laudum

Plebs letabunda, clerus quoque voce iocunda,

Athlete domini recolens sacra festa Ketilli.

Inuitatorium

In sanctis dominum trinum laudemus et vnum,

Qui meritis rutilum transuexit ad astra Ketillum.

Hymnus

40

Festiva dies colitur, in qua migrasse traditur

Christi fidelis assecla Ketillus ad celestia.

Sonent ergo nunc tinnuli harmoniarum moduli,

Et collaudemus consona voce dei magnalia,

Qui choruscantem meritis et virtutum prodigiis

45

Asciuit sanctum hunc sacro sanctorum contubernio.

Deo patri sit gloria eiusque soli filio

Cum spiritu paraclito in sempiterna secula

In primo nocturno antiphonae

Edita nobilium proles de stirpe parentum

Vt radiis sydus micuit virtute Ketillus.

50

Simplex, innocuus, patiens et corpore castus,

Igne calens superum spreuit cum germine mundum.

In donis crescens celestibus hinc adolescens

Cognitus est vere domino populoque placere.

Responsoria

Contemptis igitur parentum opibus

55

Diuitiis intendebat celestibus,

Vt relinquens peritura possideret permansura

Cum sanctis in gloria.

Sub iugo religionis renitens virtutum donis

Sacerdos est consecratus et in grege sublimatus.

In secundo nocturno antiphonae

60

Forma gregis factus per mores atque per actus,

Quos informauit, hos verbi semine pauit.

Christum suscipiens Christum per membraque pascens

A Christo pasci meruit dape spirituali.

Vir sanctus tribuit, dominusque magis superaddit:

65

Succrescunt dona, succrescit et aucta corona.

Responsorium

Tu, vite speculum, mundi preclara lucerna,

Nos exempla sequi tua fac per dona superna.

In tertio nocturno antiphonae

Qui populo Christi viuendi forma fuisti,

Moribus ornari nos et te fac imitari!

70

Ad te clamantes famulos veniamque precantes,

Alme pater, domino, Ketille, reconciliato!

Qui dono Christi virtutibus emicuisti,

Hanc defende tuam, pastor venerande, cateruam!

Responsorium

Gemma clara confessorum, norma gregis, forma morum

75

Pro salute deuotorum funde preces famulorum!

Ad Laudes antiphonae

Ad laudem domini cantus promantur et hymni,

Qui tribuit sancto virtutum dona Ketillo:

Qui variis renitens donis signisque refulgens

Restituit visum cecis, claudis quoque gressum.

80

Surdos ac mutos et lepra commaculatos

Sanos reddebat et opem multis tribuebat.

Ergo deum celi benedicite corde fideli

Atque pium seruum, facientem signa per illum.

Cuius erat vita morum radiis redimita,

85

Eius nunc opera lucent virtute referta.

Refulget dies annua, que ad festa continua

Quorumque suspirantium mouet mentes fidelium.

Vnde predulci domino dulci psallamus iubilo

In hac sui sanctissimi solennitate famuli,

90

Qui de verbi dulcedine gregem consueuit pascere

Et in collecto pauperum cetu collegit dominum.

Nunc Marthe vicem exequens, nunc cum Maria residens

Per vtriusque meritum est nactus vite premium.

Laus, honor, virtus, gloria deo patri cum filio

95

Et spiritu paraclito in sempiterna secula.

Super Benedictus antiphona

Exultans celebra melorum laude canora

Sacra patris nostri votivaque festa Ketilli,

Hinc quem sublatum felicius et sociatum

Cetibus angelicis veneratur turma fidelis.

100

[In secundis Vesperis super Magnificat antiphona]

Magni magnifice regis bone fideque serue,

Introgredi Christi qui gaudia promeruisti,

Pro nobis ora, quo perueniamus ad illa!