De illis qui intrant religionem

Sepe solutus homo uetiti ratione ligari

      Querit, et absolui sepe ligatus avet.

Multi sepe statum proprium mutare laborant,

      Contenti nolunt ordinis esse sui.

5

Religionis onus iuuenes hinc sepius optant,

      Qui cum sunt intus, de foris esse uolunt.

Religio tamen est uiuendi sobrius ordo,

      Et contra mundi tuta pericla salus.

Non igitur doceo uos non assumere uitam

10

      Religionis: amat uir bonus omnis eam.

Et uobis, si forte uolet quis linquere mundi

      Officia, quibus res nequid ulla dari,

Sique suam cupiet tranquillam ducere uitam

      Et se deuota reddere mente Deo,

15

Lex octaua docet breuiter quid religionis

      Postulat ordo, iugum quale sit eius, eum

Quod proprium est commune facit, dat propria nulli

      Religio, castum uelle negando petit.

Sunt tria, paupertas, mens casta, negata uoluntas,

20

      Que seruanda sibi religiosus habet.

Nil sibi conpriuet, castus sit, obediat ille

      Viuere qui sancta religione cupit.

Diligat ecclesiam, claustrum non deserat, urbes

      Negligat, et nunquam uana uidere uelit.

25

Posse suo studeat scripturas discere sacras,

      Sanctorum gestus semper legendo notet.

Aut legat, aut oret, uel tempore dante laboret:

      Hec tria de monachi tedia mente mouent.

Colloquium uitet, seruet ieiunia, seruet

30

      Omnia que sanctus precipit ordo suus.

Sitque uerecundus, stabilis, mansuetus, honestus,

      Effugus a uiciis, promptus ad omne bonum.