Oracio et humiliacio pugnaturi

 

Sis michi protector, rerum, Deus unice, rector,

Vt folium flector, tua cum non docmata sector.

Tu meus adiutor, Deus, es, dux et retributor,

Perpetuus tutor, ope cuius ego reus utor.

5

Christe, patris forma, me, lux formosa, reforma,

Me tibi conforma deformem, splendida norma!

Christe, michi misero, que sunt bona, te dare quero,

      Qui quamvis sero plangere promptus ero.

Corda levans prona sanctorum, sancta corona,

10

Duratura bona michi, Christe piissime, dona!

Egra, Deus, sana faciens ac aspera plana,

Hos oculos sana, ne cernant amodo vana!

Omni momento me, Christe, iuvare memento,

Vt folium vento prosternor ab hoste cruento.

15

Te, qui confessus sum, Christe, meos rege gressus,

Hostibus obsessus sum totus te sine fessus.

Cur me, Christe, sinis fragilem? Meus est prope finis,

Est mea vita cinis mortis solvenda ruinis.

Est homo de cinere factus, cinis incinerandus,

20

Sed surget vere reprobandus sive probandus.

Humano cineri cineris succurre creator,

Infirmo generi miserere salutis amator!

Per te, Christe, bone, vivo fungens ratione,

Me prope te pone, me protege, summe patrone!

25

Me tibi delibo, Deus, ad quem mortuus ibo,

      Me rege, quando cibo, vado, quiesco, bibo!

Si sectatus Adam primum fuero, male vadam,

Hunc imitando cadam, sic et sceleri scelus addam.

Immemor et spissus animus, per crimina scissus,

30

Culpis submissus, est horrida noctis abissus.

Cessat caligo, nova splendet lucis origo,

      Cum me castigo, fletibus ora rigo.

Si terat ossa labor, a culpis purificabor,

Denuo purgabor, si flevero, quando relabor.

35

Rex pie, converte perversos, qui nisi per te

Converti certe nequeunt, hoc constat aperte.

Quam sua culpa ferit, te, Christum, mens mea querit,

      Per te sospes erit, te sine lesa perit.

Non est mens sospes, cuius non est Deus hospes.

40

Rector, Christe, poli, me servum spernere noli,

      Parce tue proli, tela retunde doli!

Sum pugil imbellis, mea nam michi sepe rebellis,

Debilis est pellis, viciorum plena procellis.

Hostes qui vellis, Deus, arma nocentia pellis,

45

In gravibus bellis manibus succurre tenellis!

Tu culpas aboles, o virginis inclita proles,

      Tu potes has moles tollere, quando voles!

Me longus langor culpe premit, hostibus angor,

A viciis frangor, doleo, dum vulnere tangor.

50

Infelix ego sum, me sentio vulnere fossum,

Surgere non possum, quia limo fixus homo sum.

Natus homo mundo cito transeo sicut hyrundo,

Tunc me confundo, cum mundi rebus abundo.

Casu iocundo vel tristi mens ut arundo

55

Volvitur in mundo, viciorum mersa profundo.

Culpa conceptus homo sum, peccator ineptus,

Multum deceptus sed dona salutis adeptus.

Cum peccata sequor, mea mens sic fervet ut equor,

      Mentis, Christe, decor, auxiliare precor!

60

O Deus, esto memor miseri, quoniam tibi demor,

      Victus ab hoste premor, concutit ossa tremor.

Culpe rubigo deletur, cum crucifigo,

      Cum simul affligo, cum mea membra ligo.

Hostes confunde, michi vires, Christe, refunde,

65

Te, Deus, infunde menti, mala spicula tunde!

Christe, dolos arce, summa qui cernis ab arce,

Queso, michi parce, qui nescis parcere Parce!

Alme Deus, michi sis clipeus, ne demoniorum

Me teneat laqueus, rapiat puteus viciorum.

70

Vera redemptio, spes, iubilatio, rex pie Christe,

Te volo, gestio, te sine socio cor michi triste.

Vt vigil in morte fatear te, Christe, precor te,

Ne caream forte paradisi perpete sorte.

Christe, michi leso, viciorum pondere ceso

75

Subvenias, queso, servo, moderator, obeso!

Quando delinquo, celestia regna relinquo,

Sed Deus est, in quo carnis contagia vinco.

Qui michi succurris, Deus, es fortissima turris,

Ad quam confugio, quia tutus te duce fio.

80

Vilis et extremus in aquis pereo, nisi remus

Christus subveniat, michi portus et anchora fiat.

Me Domino vero totum supponere quero,

      Cuius opem spero, quando cadaver ero.