De incarnacione domini

Est verbum verum caro factum fine dierum,

Hostem morte ferum vicit res optima rerum.

Et Deus est et homo Christus, quem carmine promo:

Est Deus a patre sed homo de virgine matre.

5

Quod cecinit vates referens per carmina grates:

      "Verbum carne pates sed deitate lates".

Est Deus absconsus natus de virgine sponsus,

Labe carens prorsus, agnus sine murmure tonsus.

Femina primeva radix vicii fuit Eva,

10

Que pena seva prolem damnavit in eva.

Sol Deus illuxit, carnem de virgine duxit,

Sic nos instruxit et oves in ovile reduxit.

Est noster portus Deus, alvo virginis ortus,

Sic est absortus coluber, colit infima tortus.

15

A patre progressus homo factus et in cruce pressus,

Mortem perpessus surrexit ad alta regressus.

Verbum descendit caro factum, fuste pependit,

Surgens ascendit, sic ad sua regna tetendit.

Celos qui scandit, nos post se scandere pandit.

20

Ex quo factus homo Deus est de virgine natus,

      Degenerare sinat nobilitatus homo.

Salvans clementer potuit salvare potenter,

Christus gaudenter passus vicit pacienter.