De pugna contra carnem

 

Pugna, dum vivis, victoris gaudia si vis,

Summus eris civis viciis obstando nocivis.

Carnem mortifica, licet hec videatur amica,

Non est pacifica, pigritantibus est inimica.

5

Frange resistentem tibi, corripe decipientem,

Torque torquentem, rege, si sapis, insipientem!

Frenis effrenam refrena, crimine plenam

Et lenem lenam rationis duc per habenam.

Es, caro, stulta nimis, requiem que queris in imis,

10

Virtutes adimis preponens ultima primis.

Dira noverca caro, quovis est peior avaro,

      Frustra litus aro, dum sibi plura paro.

Dilige virtutem, qui queris habere salutem,

      Coge iuventutem, disce domare cutem!

15

Terram carnis ara, ne sit sterilis vel amara,

Cor rege, cor repara, tua numquam mens sit avara!

Carnem labentem, delectamenta petentem

Et facilem mentem rege, consentire volentem!

Cor serva castum, motus cohibe, fuge fastum,

20

Et corpus pastum rege, mundum despice vastum!

Esto studendo macer in corpus et asper et acer,

      Sic scandes alacer regna superna sacer.

Cur laute nutris carnalis iners onus utris?

Est caro corrupta viciorum scismate rupta.

25

Macta caro servit, nimis impinguata protervit;

Fex, rogus et vermis est ulcio carnis inermis.

Culpe venatrix fetet caro, carnis amatrix,

Luxurie latrix epulas cupiendo voratrix.

Stans inter iuvenes prodest, ut membra refrenes,

30

      Que nocitura tenes, linque sequendo senes!

Morum thesaurum cumula, virtutis et aurum,

Victor fer laurum corpus prohibens quasi taurum!

Plus nocet, ut nostis, longinquo proximus hostis.

Non tua cara caro tibi sit, quia vult bona raro;

35

Officit ignaro cordi contraria caro.

Hanc, mens, castiga, morum ductrice quadriga,

      Corpus auriga, membra soluta liga!

Mens nisi sit preses, peccare cupit caro deses,

Mortificata caro patrat contraria raro.

40

Corpus inexhaustum Veneris descendit ad haustum,

Illius incaustum fugiens te fac holocaustum!

Carni suppositus, quam non domat, est parasitus,

Illicitos cohitus debet vitare peritus.

Carnem, que turget, animam, que fortiter urget,

45

Quilibet expurget, ut plaudat, quando resurget.

In peccata cadunt, qui, quo ducit caro, vadunt;

A quibus evadunt, qui membra cruci sua tradunt.

Decedunt tuti, Christi mandata secuti,

Cuius virtuti dant laudes carne soluti.

50

Qui famulando cuti non cessant dulcibus uti,

In fetore luti merguntur sepe voluti.

Sunt homines veluti, qui spernunt celica, muti,

More iacent bruti, mendacia vana locuti,

Sordibus imbuti sua demunt membra saluti.

55

In culpam preceps exculta facit caro saltum,

Asperius nichil est humili, cum surgit in altum!

Impinguata caro templum mentale prophanat,

Omne supervacuum pleno de pectore manat.

Cultor homo carnis est sicut bestia factus,

60

Pinguis aqualiculus Veneris despumat in actus.

Corporeis laqueis mens inquit vincta fidelis:

      "Heu, pacior telis vulnera facta meis!"

Gaudia vult minima mundi caro vilis et ima,

Sed sapiens anima bona celi gestit opima.

65

Sicut sessor equum, sic carnem mens regat equum,

Est satis, ut cecum studeat dux ducere secum.

Subditus exterior homo serviat interiori,

Providus interior homo consulat exteriori!

Est ignobilior subigendus nobiliori,

70

      Alter in alterius debet amore mori.

Prompta sit ancilla caro, mens dominetur in illa,

Est pax tranquilla famulanti carne pusilla.

In Domino iacta spem, qui faciet tua facta,

Et carnem macta, mala lamentare peracta!

75

Carnem compesce, preciose sint procul esce,

Docmate pinguesce, morum splendore nitesce!

Quilibet enervet carnem, quociens male fervet,

Que peccando ruet, nisi membra modestia servet.

Esto verecundus in corpore menteque mundus;

80

Cunctis vilescit, quicumque rubescere nescit.

Laudis honore vir absque pudore caret reprobandus,

Absque valore loquentis in ore parum venerandus.

Illecebrosa caro mentem facit irreverentem

      Et formam pondus materiale premit.

85

Sevit, non servit, dominatur, non famulatur,

      Vtile consilium spernit obesa caro.

Crassa nocet, damnosa docet legesque relegat

      Et negat et urit cor, temulenta furit.

Vult requiem, timet esuriem fugiendo laborem,

90

Temperiem querit, glaciem fugit atque calorem.

Quanto plus colitur, caro sordet, sorde potitur,

Motus damnosos viciosa parit, viciosos.

Molliter optat ali caro, discola religioni,

      Torva noverca boni, magna magistra mali.

95

Indomitam frenis carnem compesce cathenis,

Ludit in obscenis caro ruptis iuris habenis.

Vt castigetur operans, caro debilitetur,

Mens contempletur celi decus et meditetur!

Spuma caro facta, vite tempus breve nacta,

100

Illecebris fracta fetoris anhelat ad acta.

Laute nutrita, viciorum pondere trita,

Currit ad illicita, cui displicet ardua vita.

Est variis desideriis caro subdita gaudens

Deliciis ac diviciis, quod non licet audens.

105

Est mens captiva, que carne trahente nociva

In culpam trahitur, languet, moritur, sepelitur.

Actu servili caro fit de spermate vili:

Est erumnosa, pigra, sordida, vermiculosa,

Morte cadit dura caro, vermibus esca futura.

110

Motus febrilis reserat, quam sit caro vilis,

Frivola seu fragilis, iuvenilis sive senilis.

Vivens in carne carnalia gaudia sperne!

Vive super carne, tua sepe novissima cerne!