De patientia

 

In te peccanti veniam largire precanti,

Vt tibi parcatur! morituris, o moriture,

Sponte remitte parum, tibi si vis multa remitti,

      Vt valeas aliis parcere, parce tibi!

5

Qui sibi crudelis, aliis nequit esse fidelis,

Nulli prodesse vult, qui sibi gliscit obesse.

Qui se precipitat vel in altis mergitur undis,

      Quos valet ipse trahens precipitare cupit.

Cor varium muni, discordes insimul uni,

10

Rerum communi Domino sis subditus uni!

Presta mendicis, ignosce tuis inimicis,

Et bona, que dicis, fac, esto fidelis amicis!

Mitis, pacificus, inimicis sis et amicus,

Mollis, veridicus tuus assit sermo pudicus!

15

Dulcia per verba mens sepe quiescit acerba.

Inter perversos, culparum gurgite mersos,

Frater dilecte, non cesses vivere recte!

Inter discordes concors et inter iniquos

      Equus et oppositis hostibus esse pius!

20

Forte licet videas mala multos multa patrare,

      Vnicus in multis tu tamen esto bonus!

Consilium carum medici servando periti,

Omnipotens nosti veniam dare sepius hosti,

Vt licet antiquus inimicus fiat amicus.

25

Cesus et afflictus, effuso sanguine pictus,

Iudex districtus pro gente sua tulit ictus.

Pro crucifigente Crucifixus fundere gente

Vota precum duxit, pro gentis crimine luxit.

Pro nobis magnus crucis interitum tulit agnus,

30

Vt, faciens magnos nos, verteret agnus in agnos.

Huius ad exemplum cum sis, homo, nobile templum,

Hostibus ignosce, veniam sine scismate posce!

Actor vindicte non sis, frater benedicte,

Vince, vir, afflicte, genti parcens maledicte!

35

O, pugil invicte, decet hostes vincere sic te,

Dilige non ficte, tibi prodest vivere stricte.

Hostes si iuste vis vincere, vince prius te,

Vivens anguste mala vite tolle vetuste!

Celos amittis, si non ex corde remittis,

40

      Sis pius et mitis, qui bona summa sitis.

Instabiles stabilis conforta, consule cautus

      Incautis, lapsos rectificare stude!

Si contradicant tibi multi probraque dicant,

Tu promissa poli tibi regna relinquere noli!

45

Fortior est forti, paciens regit impacientem,

      Mitigat immitem, portat honoris honus.

Est miseri miserens et compaciens pacienti,

      Plus sibi vim fieri quam violare cupit.

Secum luctatur, sibi precipit et dominatur,

50

      Non conturbatur sobrietate satur.

Rem facit insignem, succensum suffocat ignem,

Qui, si duraret, cordis penetrale cremaret.

Mulcet et excusat, temere certare recusat,

Discordes iungit, blandis sermonibus ungit,

55

Erudit ignaros animos, solatur amaros;

Non ledit lesus, non optat cedere cesus,

Ire languori dat opem cedendo furori.

Est probitas clara decus et victoria cara,

Vt mens ignara non fiat propter amara.

60

Destruit omnia, parturit impatientia luctum,

Vincit corda ferocia, dat patientia fructum.

Servus liberve, caveas certare proterve,

Igne Dei ferve, conservum dilige, serve!

Vir pius abstinet, orat et optinet utilitatem,

65

Moribus eminet, ire desinet asperitatem.

Proximus absque Deo, minime Deus absque propinquo

      Diligitur, servos servus amatus amet.

Omnibus una fides, Deus unus et unica merces,

      Vnum baptismi munus et una salus!

70

Omnes omnino nos uniat unio pacis,

      Vnicus unitos nos iubet esse Deus.

Omnipotens punit, quos non amor unicus unit,

Semper amans homines, hominum viciis inimicus.

      Sis clemens hominis auxiliator, homo!

75

Ius iniusticiam, pietas fugat impietatem,

      Naturam refovens, corripiendo malum.