De fraudibus mulierum

 

Est res venalis mulier, levis ac pecualis,

      Pestis letalis, usibus apta malis.

Que caput extollit, sermones femina mollit

Fructus decerpens, fundens virus quasi serpens.

5

Femina fetoris vas, venativa favoris,

      Optat raptoris more nocere foris.

Amplexus captat mulier, que membra coaptat,

Sepe nocere vago iuveni solet apta virago;

Non est in pelago peior meretrice vorago.

10

Non debet cerni, sed prorsus femina sperni,

Que vult prosterni nec flammas horret Averni.

Qui tenet inclusam meretricem, sordibus usam,

Deserit illusam, Veneris torrente refusam.

Vilem, confusam cito pellat ab ede, retrusam;

15

Defleat infusam se morum perdere Musam.

Lena rogata negat, deserta fugat fugientem,

      Si non voce tamen sepe sequendo rogat.

Hec caligo soli claro contraria soli,

      Contra iura poli vult sua membra coli.

20

Est ad delicta proclivis femina picta,

Cum specie ficta fingendo polit sua dicta.

Per rubra tecmina, per modulamina, causa malorum,

Fetida femina decipit agmina sepe virorum.

Luxurie febre corpus fervet muliebre;

25

Illius illecebre, fraudis simulacio crebre.

Verba, placens vultus, risus, vox consona, cultus,

Hec faciunt, stultus ut compediatur adultus.

Est infelicis amor illicitus meretricis,

Verbis falsidicis miseris dat virus amicis.

30

Donum donante plus diligit, exigit ante

Vultu placante, dissentit nemine dante.

Femina rancorem simulat, prolongat amorem,

Torquet amatorem, quem ridet ferre laborem;

Ingeminat penam faciem faciendo serenam.

35

Si valeat plenam penitus vacuare crumenam,

Annuit, incendit, subtilia recia tendit,

Pacat et offendit, pro lucris damna rependit.

Femina, cum prope stat, hominem capit et dehonestat,

Vexat et infestat, facinus facit et manifestat.

40

Pannis se vestit preciosis, munera gestit;

Fetet sepe caro panno circumdata caro.

Alba superficies et planicies mulierum

Mollicies parat et species, dispendia rerum.

Femina, que sordet, hominis precordia mordet,

45

Collum circumdat velut anguis, cuius abundat

Virus, ut infundat orbem, dolus eius inundat.

Se permittit emi meretrix, a demone demi,

Prostituendo premi, Patris odit iussa supremi.

Vult dominari, non famulari, gaudet amari,

50

Vult venerari, magnificari, sepe rogari.

Femina composita componit verba polita,

A multis trita contagia vult repetita.

Sponte, nec invita, se privat perpete vita,

      Aufert gratuita munera, fallit ita.

55

Ad mala concurrit et pauper facta recurrit,

Currit et occurrit et fercula lauta ligurrit.

Castam mentitur se, veste comis redimitur,

Prostat, blanditur, gena cuius sepe politur.

Bellica, pacifica, lenis, simplex et iniqua,

60

Admiror, si qua mulier sit amantis amica.

Mesta nimis, si det, si sumat munera, ridet,

      In triviis residet et nova queque videt.

Fraudibus os plenum vomit exiciale venenum;

      Est laqueus iuvenum, mors aliquando senum.

65

Supplex, festina, pro nummis stat resupina,

Cuius sentina gravis est et magna ruina.

Noscere secreta maris optat femina spreta,

Mesta fit ex leta, latet et patet irrequieta.

Vas vacuum, fatuum, nocuum, nequit hoc cumulari,

70

Proficuum putat esse suum sine lege vagari.

Prodiga sermonis mulier via perdicionis,

      Incumbit donis moribus absque bonis.

Femina picturat faciem; promptissima curat,

Vt iuvenes urat; ornata parum caro durat;

75

Bursas emungit, se pluribus unica iungit,

Mellifluis ungit verbis, ut scorpio pungit.

Profert damnosa mulieris lingua dolosa.

Femina formosa fit amanti suspiciosa!

Femina fons scelerum, vix novit dicere verum;

80

      Ipsius tenerum corpus inescat herum.

Vt referunt veterum monumenta vetusta dierum:

      Cor faciunt miserum femina sive merum.

Femina protelat quod vult, deformia velat,

Ad tempus celat, tandem secreta revelat;

85

Vultum depingit et crines femina tingit,

Auro se cingit, mendacia plurima fingit.

Estuat, obliquat oculos, "tua sum" quasi dicat,

      Sepe comam replicat, ornat amicta, micat;

Plorat et implorat, sua membra colore colorat,

90

Orat et explorat viciumque decore decorat;

Abluit et comit, comptum caput invida promit.

Hec expectantem tardans affligit amantem,

Fallens zelantem studet exhaurire rogantem.

Plus nocet urticis amor et tactus meretricis,

95

Contaminatricis, que sevior est inimicis.

Femina Samsoni, David obfuit et Salomoni;

Hanc fugere boni celestis munere doni.

Primum prima suum cito sponsum sponsa fefellit,

Prudens feminea longe consorcia pellit.