De feditate luxurie

 

Mater fetoris Venus est, iactura pudoris,

Ficti dulcoris brevitas et causa doloris.

Sub gremio domine gemine sunt antra latrine,

Fetent vicine sentine more carine.

5

Non valet esse sine fetore latrina latrine,

Fetens fetenti coniuncta, movens pacienti.

Venter ventosus meretricis, vermiculosus,

Mollis, carnosus, fetens est luxuriosus.

Sordibus est plenus mulieris venter amenus,

10

      Turpis et obscenus, profluit unde Venus.

Filia torporis Venus, actio vilis odoris,

Fornax ardoris, adimit decus omne decoris.

Febris fervoris est languor amarus amoris,

Intus sive foris factum cremat omnibus horis.

15

Carcer amatorum Venus est et nox oculorum,

Scisma propinquorum, sonus et rumor populorum.

Ob Venerem vetitam, semel ac iterum repetitam,

Perdit homo vitam, morum gemmis redimitam.

Corporeus sudor, carnis funus, ustio mentis,

20

      Fumus corruptus, demonis esca placens.

Alliciens viscus, comes, hostis, seva Caribdis,

      Virus mellifluum, perniciosa sitis.

Carnis amor vetitus, liciti defectus amoris,

Non nisi sollicitus timor est et velle furoris.

25

Seva Venus ledit, que, si quandoque recedit,

      Mox flammas edit et renovata redit.

Morbus lascivus Venus est, ignis redivivus,

Ac incentivus, consumens, sive nocivus.

Hic calor activus, passivus seu recidivus,

30

Est ablativus virtutum, non genitivus.

Sordidat et cassat hominem Venus, hostica lassat;

Presens non saciat hominem Venus, illico transit

      Et non delectat prisca, futura cremat.

Principium dulce, medium breve, finis amarus;

35

      Tale ruboris opus utilitate caret.

Noxius hic calor est, dulcor brevis, actio turpis,

      Inficiens fetor, ulcio perpes erit.

Est opus hoc fluidum, facinus madidum sine fructu,

Os sapidum facit insipidum cum perpete luctu.

40

Transit servile scelus istud, inutile, vile,

Pondus difficile, quod frangit robur herile.

Concremat affectus Veneris variabile pectus,

Illius effectus rogus est sub pectore tectus.

Durans dulcedo non est in crimine fedo,

45

Cor rapit ut predo Veneris violenta gravedo.

Quem capit et madidat, maculosa libido trucidat,

Cum male collidat; vir nullus in hac lue fidat!

Pullulat in nido carnis furiosa libido,

Molitur stolido plagas inferre cupido.

50

Mentes corruptas facit empta dolore voluptas,

Provocat innuptas faciens divertere nuptas.

Est Venus ut Cilla, vorat hec hominem, ligat illa;

Vix est tranquilla vaga mens in divite villa.

Damna dat ignavis Veneris fex, plaga suavis,

55

      Omnibus est pravis pena statuta gravis.

Hec dulcedo levis et delectatio, que vis,

      Est penis sevis tota luenda brevis.

Mens effrena furit, Veneris quam flamma perurit.

Plenus fetoris amor est et fetor amoris,

60

Sordis et ardoris Venus est, fex, causa laboris.

Fetor fetores, fex feces, stercora stercus

      Et livium livius, corpora corpus amat.

Ex macula Veneris veniunt fex, fetor et ardor,

      Sumptus et esuries, mors, mala fama, timor.

65

Non prodest sed obest penetrabilis estus amoris,

Febris adest et abest Veneris variantibus horis.

Inflat membra tumor Venerisque coinquinat humor,

Virtutes tollit, fortes animos cito mollit,

Sensus dissolvit, sicut folium leve volvit;

70

Carnem titillat, cum mens incauta vacillat,

Famam deflorat, fetet locus, unde vaporat.

Infert langores Venus, aufert pessima mores,

Corpus corrodit, tenebras petit et iubar odit;

Gignit egestatem, furatur prosperitatem,

75

Audit sermonem turpem, sepelit racionem;

Verba pudicicie fugit et documenta sophie.