Hic famulus Christi mira virtute refulgens

      Waldomeris humo conditus astra tenet,

Conspicuus vita, pretiosa morte sacratus,

      Credentum populis dona beata ferens.

5

Huius enim precibus solvuntur vincla reatus

      Et praesens Christus fert bona cuncta suis.

Languidus hinc sospes remeat, hic daemonis atri

      Vis truculenta fugit, vita salusque redit.

Hic perdunt zabulus vires, incendia Maurus:

10

      Cedunt hic meritis Tartara, sancte, tuis.

Te pietas, te clara fides provexit ad astra:

      Nos tua prex tristi servet ab igne reos.

Soli insunt tumulo sacrati corporis artus:

      Vidimus ipsi, oculis sit manifesta fides.