De caritate

 

Militat omnis amans Christi preconia clamans;

Christi milicia decus est et summa sophia.

Dulcor dulcorem fugat, ignis amoris amorem,

Illicitum licitus; licitum vult quisque peritus.

5

Dulciter illaqueat, premit et feliciter urit,

      Erudit ac honerat, stringit honestus amor.

Sauciat et pungit, refocillat, sanat et ungit,

      Armat et exilarat corda pudicus amor.

Pacificat, reparat, renovat, recreat, moderatur,

10

      Fulcit, mirificat corda salubris amor.

Hinc oritur requies et contemplacio sancta,

      Pax et libertas et bonitatis odor,

Actio recta, salus, pietas, devocio, norma,

      Forma pudicicie, strenuitatis honor.

15

Ornat, nobilitat amor hic, dans premia ditat,

      Commonet, invitat, ad meliora citat.

Servat et accendit amor almus, in ardua tendit,

Mentem defendit et lucis dona rependit.

Mulcet, dulcorat, sublimat, honestat, honorat,

20

Postulat, implorat, gemit et pro gente perorat.

Hoc est officium probitatis et utilitatis,

      Nobilitatis apex, sobrietatis opus.

Hoc fedus carum, libamen deliciarum,

Mentis opus clarum, pluit uber diviciarum.

25

Obstruit ac aperit sensus, celestia querit,

      Carnis facta terit, semina casta serit.

Proficit amplexus utriusque modestia sexus,

Non est perplexus homo casto federe nexus.

Celitus influit inclitus hic amor, aptus, amenus;

30

Est licitus, sanctus, placitus, sine nocte serenus.

Hic homines vigiles facit et pugiles, animosos

Ad bellum, dociles, agiles, habiles, studiosos,

Mites, iocundos, devotos et reverentes,

Doctos, facundos, humiles, patriam sitientes,

35

Hostibus ereptos, solium virtutis adeptos,

Fortes, acceptos, Domini formidine septos,

Promptos, munificos, servantes iura, pudicos,

Sponte sua modicos et paupertatis amicos.

Fons dulcoris, culmen honoris et actus odoris,

40

Fama nitoris, aroma pudoris, origo decoris,

Virtutum lumen, subtilis mentis acumen,

Letificans flumen et amoris forte bitumen,

Dulcia colloquia, suspiria, cantica, vota

Et pia consilia, morum cognacio tota.

45

Ex hac censura felici gaudia pura

Procedunt plura, veniunt equissima iura.

Orandi studia, ieiunia, lectio grata

Et desideria, victoria, laus iterata,

Gracia sermonum, discrecio religionum -

50

      Omne quidem donum provenit inde bonum.

Procreat hos flores amor iste, vaporat odores,

Salvat amatores et eis largitur honores.

Est miser et tristis animus sine floribus istis.

Oh, si sentirent et amoris premia scirent,

55

Semper obedirent homines, eterna sitirent,

Sursum respicerent et in altis corda tenerent,

Mundum respuerent, carnis stimulos cohiberent!

Lucis amatores, iuvenes simul et seniores,

Virtutum flores teneatis, ametis odores;

60

Flores colligere vos condecet et retinere,

Quos non marcere contingat sed redolere.

Cor dilatatum vult delectabile gratum

Perpetuum, latum celi memorabile pratum.

Continet illa domus florum species preciosas,

65

      Semper habens violas, lilia celsa, rosas.

Victrix dempta malis, rubra contio martirialis

Significata rosis est dulcibus et speciosis;

Purpuree viole, posite sub perpete sole,

Sunt confessores, quorum sentimus odores.

70

Lilia directa declarant agmina recta,

Que votum gratis tenuerunt virginitatis.

Hii flores presunt, non uruntur neque desunt.

Hec contemplari decus et decor est meditari,

Hiis delectari mens debet honesta iuvari.

75

Ille beatus amor, ubi non dolor est neque clamor,

Non labor aut pena, sed visio mentis amena.

Christus amabilis, insuperabilis, huius amoris

Dux venerabilis est, pater utilis, actor honoris.

Ipse cibus mentis, homo, filius Omnipotentis

80

Delectamentis animam replet esurientis.

Ad fontem vite sicientes, queso, venite!

Quod satis est, bibite, muniti moribus ite!