De labore libidinosi

 

Falsus falsidicam venatur amicus amicam,

Mendax mendicam sibi iungit, iniquus iniquam,

Mechus amat mecham, mala semper vult homo nequam,

Stultus habens cecam mentem rem respuit equam.

5

Porcino more captus meretricis amore

Est in fetore pulso virtutis odore.

Que fit in occulto, placet actio sordida stulto,

Affectu multo, racionis honore sepulto.

A carnis lapsu vix sentit homo piger absu -

10

Mi vel vexari nec pondus amoris amari.

Respice, quis Veneris finis, qui turpia queris:

      Facta nephanda geris et repetendo peris.

Dulcius esse merum constat cohitus mulierum;

Si bene scruteris: corpus fetet mulieris.

15

      Quam nisi coneris spernere, servus eris.

Si quot fetores procedunt de muliere

Providus explores, fetebunt, que placuere.

Pro Veneris torre tormenta parata Gomorrhe

Fortiter exhorre! non est res hac gravior re.

20

Noli prospicere formam nimis in muliere,

Sperne, miser, misere meretricis membra tenere!

Est fornax Veneris mulier, quam tangere queris,

      Iacturam pateris, si sibi dona geris.

Non valet esse satur, quisquis Venerem veneratur;

25

Pallet, tristatur, desiderat, extenuatur.

Anxius et dubius est igne libidinis ustus,

Nescius et varius, laqueis gravitatis honustus.

Sollicitat, rogat et latitat venator amoris,

Febricitat, se precipitat de rupe furoris.

30

Cespitat et dubitat nec aperta pericula vitat,

Palpitat et fluitat corpusque volubile ditat.

Suffert, desperat frustratus; denuo sperat,

      Si sors grata ferat, quod meditatus erat.

Ludit, lascivit, temptans quecumque cupivit.

35

Quem Venus attrivit, in sollicitudine vivit.

Vt fur incedit, mulieri pronus obedit,

      Agnitus abscedit, mox sine teste redit.

Ad scelus accedit, anime precordia ledit,

      Perdit, non credit, que male dona dedit.

40

Ardet, suspirat, se per loca plurima girat,

Tedet, delirat, sic vivere nemo requirat!

Qui nutrit scortum, virtutum deserit hortum.

Qui nutrit scortum, solis non respicit ortum.

Qui nutrit scortum, vult vite perdere portum.

45

Qui nutrit scortum, colubrum vult tangere tortum.

Qui nutrit scortum, cor habet putredine sorbtum.

Qui nutrit scortum, corrumpit corda cohortum.

Servit homo loris carnalis vinctus amoris,

      Corpus amatoris gaudet inesse thoris.

50

Pulcra daturus emit, nummos et se sibi demit,

      Absque timore tremit, absque dolore gemit.

Contabescere, non requiescere gestit amator,

Vult tenebrescere, non renitescere, contaminator.

Si fieri posset, quod amans, quid amat, bene nosset,

55

Quod nocet, odiret, ab amore malo resiliret.

Instantes voci blande cum mente feroci

      Fingunt verba ioci, turba maligna, proci.

Torpent indocti, torrente libidine cocti,

Applaudunt nocti; contemnunt noxia docti.

60

Cladibus, heu, quantis teritur caro luxuriantis!

Morbis oppressa, vexante libidine fessa,

Sordibus infecta, veteri putredine tecta,

Concassata nimis, revoluta frequenter in imis,

Actibus impuris confracta, repleta lituris,

65

Frivola, rugosa, fetens simul et scabiosa,

Feda, ruinosa scelus appetit, impetuosa.

Deficiens, nil proficiens nequit exagitari.

Esuriens nimis et siciens nequit exsaturari.

Sepe fatigata cutis est peccare parata;

70

Est virtus magna viciorum linquere stagna.

Abdicat omnia lubrica gaudia mentis honestas,

Corda patrantia crimina turpia torquet egestas.

Ianua celestis in morte patebit honestis,

Tartarus incestis perdetque malos mala pestis.

75

Per luta luxurie qui volvunt se quasi porci,

Igneus absque die locus illos puniet Orchi.

Castos extolles, Deus, et reprobans cito tolles

Spurcos et molles faciens descendere colles.

Se pro dulcore brevis et vix unius hore

80

Obligat elatus ad perpetuos cruciatus.

Vivere tranquille qui non vult, est miser ille;

Vnicus est mille, vix vitat recia Sille.

Felix est vita, que moribus est redimita!

Que sunt illicita fugit et fugat Israhelita!

85

Membra voluptati sua subtraxere beati,

      Gaudent salvati nulla flagella pati.

Vitam semper habe puram vivens sine labe!