Ad confortandum perseverantiam religionis

 

Que sibi permittit Deus edere, carmina mittit

Petro Raymundus, cui monstrat inania mundus.

Nolens confundi, nec claustra subire profundi,

Liquisti mundi profugas faleras perhibundi.

5

Ordinis in portu lucis specularis in ortu,

Orans opportune serva mobile cor tu!

Esto pugil fortis ob amene premia sortis,

Gaude consortis in paupertate cohortis!

Hoc in agone vie comple precepta sophie,

10

      Cursum iusticie perfice nocte, die!

Petre, comes Petro fies, hoc utere metro!

Sperne redire retro, ne stes in tramite tetro!

O Christi tyro, sis splendor in agmine miro;

      Est gravis in giro pugna parata viro.

15

Nulla nocens cura! vestis, iocus, esca, figura,

Pompa, creatura rapiant tibi gaudia plura.

Non viror aut herba vel decipientia verba,

Vis vel tempestas, dolor, anxietas vel egestas,

Non consanguinei, non flentis amor faciei,

20

      Tollant dona Dei nec bona firma spei.

Pro certo didici, quod, qui reputantur amici,

Sunt animo duplici quandoque graves inimici.

Non sit in Egipto mens, in celis tibi scripto,

Ob bona promissa non sit servire remissa!

25

Suffer onus, Domini motus subeunt inopini.

Expertus memini quoniam sumus hic peregrini.

Altior es factus quam si fastigia nactus

Esses vanorum, qui dilabuntur, honorum.

Cum sanctis sanctus eris, horum dilige planctus.

30

Corpus compesce, lege, disce, tace, requiesce,

Mundo decresce, bona profer, in ordine cresce!

Stans crucis in ponte potans ex ubere fonte

In sancto non te pigeat consistere monte!

Iocunda fronte famulando profice sponte!

35

Spe venie plange, iumentum corporis ange,

Velle tuum frange, Christi preconia pange!

Corde pudiciciam cole sepe rogando Mariam,

      Rectam quere viam rem faciendo piam!

Factus es incolumis, vires surgendo resumis,

40

Mundi te fumis, viciorum subtrahe spumis!

Quem Deus aspersit, pietas cui summa pepercit,

Crimina qui tersit bene conversando, puer sit!

Hosti prostrato tibi rursus obesse parato,

Stando repugnato, ne subdas te superato.

45

Stantibus in claustro Deus auxilium dat ab Austro;

Claustri personis non frigus obest Aquilonis.

Spiritus algorem sacer aufert datque calorem,

Tollens torporem facit esse bonum meliorem.

Quamvis sera senis fit castigatio grata,

50

Gratior est iuvenis, cui norma placet moderata.

Si labor est magnus, facit esse levem pius agnus;

Si terret pena, recolendo Iesum fit amena;

Si sit acerba fames, ad dantem pabula clames;

Si sit amara sitis, tribuet fons pocula mitis;

55

Si careas tunica, virtus accendat amica;

Si desit tectum, fovet omnipotentia rectum;

Si gaze desint, in te carismata presint;

Si via sit dura, tibi sit patientia pura!

Adsit sobrietas, per quam tua splendeat etas!

60

Si quis te spernat, lauda, qui cuncta gubernat!

Cum calor insurget vel hyems, te spes bona purget!

Si lapis aut spina, glacies, nix, grando, pruina,

Aut iter obscenum vel aquosum, pulvere plenum

Lassent pergentem, recreet sapientia mentem.

65

Tedia cursoris fuget almi dulcor amoris,

Sanctorum fratrum chorus et prudentia patrum

Vitarunt baratrum per penas et cahos atrum.

A quibus erepti, fidei munimine septi,

Et non decepti, requiem sunt pacis adepti.

70

Est via penalis pax in patria socialis

      Ac eternalis omnibus absque malis.

Sis ut Abel plorans, pro peccatoribus orans,

Enoc translatus desub, super alta vocatus,

Esto gubernator sicut Nohe, caute viator,

75

Sis Abraham credens, Loth de fetore recedens,

Sis Ysaac ridens, Sathane commenta relidens,

Iacob supplantans, mala vellens et bona plantans,

Erutus a celis formam mirare Rachelis.

Si prodesse velis, imitare fidem Samuelis;

80

Sis Ioseph accrescens, in religione calescens,

Iob penas tolerans, Moyses celestia sperans;

Esto robustus David, a viciis vir inustus,

Et Simeon iustus, Daniel bonitate venustus,

Clemens Tobias, vir ieiunans ut Helyas;

85

Sis Ezechyas fortis rectusque Iosyas,

Servus ut Abdias, miranda loquens Ysayas,

Et Zacharias memor, illacrimans Ieremias.

Sit tibi Samsonis virtus, sensus Salomonis,

Qui bona proponis, sit tecum vis Gedeonis.

90

Esto Iudeus, Hebreus, homo Galileus

Vera fatendo, superna petendo, Deum cupiendo

Expositor verbi, quo dulcorantur acerbi.

Subdent imberbi tibi colla parando superbi.

Dante Deo ductus ad pascua, sunt ubi fructus,

95

Sparges instructus bona semina tempore luctus.

Perlege lecturus, ut fias docmate purus,

Ecclesie murus, decus in celis habiturus.

Vtilis est messis deponere pondera pressis,

Vincula perpessis, requiem concedere fessis;

100

Funditus errores delere docereque mores,

Tollere rancorem, componere pacis amorem,

Lapsis virtutem, lesis prebere salutem,

Hostibus auferre predas in tempore guerre,

Pauperibus terre populis suffragia ferre,

105

Lucrari multos homines, convertere stultos,

Leticiam mestis largiri, robur honestis,

Clausis egressum dare, claudis reddere gressum,

Cecos ac orbos sanare, repellere morbos,

Subdere lascivos, revocare vagos, fugitivos,

110

Cunctis prodesse nullique scienter obesse!

Doctrine flumen emundat mentis acumen,

Dans illi lumen trahit ad celeste cacumen.

Affectum prome fundendo precamina pro me,

Vt vitam mutem, peragam bona, prava refutem

115

      Ante senectutem corripiendo cutem.

Sanctum propositum decet observare peritum,

Vitet ut interitum bravium lucrando cupitum.

Conveniunt multi bona delapidare sepulti,

Iure minus fulti meditantur inania stulti.

120

Cum ieiunatis, faciatis opus pietatis,

Si que donatis bona pauperibus, date gratis!

Actus obscenos fugiens acquirit amenos

Fructus et plenos pascens, qui vescit egenos.

Educat ingratos Deus, ad peccata paratos,

125

Fraudibus armatos, ad Averni caumata natos.

Nobis, Christe pie, precibus succurre Marie,

Nostra, Iesu, vicia deterge precante Maria!

Sancte collegia fidei iuvet alma Maria,

In presente via nos consolare, Maria!

130

Mater honestatis, populis succurre renatis!

Mater hodorifera, bona fac nos querere, vera!

Mater pacifica, fac pectora nostra pudica!

Nos precibus matris Iesus actibus eruat atris,

Nos trahat a tristi puteo genetrix pia Christi.

135

Celorum domina, pro gente roga peregrina!

Eripe, regina, nos a iuventute, ruina!

Largus es in mensis, abbas Petre, Silvaniensis,

Lux tenebris densis verbis penetras velut ensis.

Que tibi metra nova mittuntur ab urbe Lodova

140

Emendans renova, qui prefers carnibus ova!

Frivolus in bello Raymundus de Rocosello,

Hos scripsi versus ad cor quandoque reversus.

Qui populi memor es, pro me, prestolor, ut ores,

Auxiliare, pater, ne claudat me locus ater!