Magnus maior maximus,

Parvus minor minimus:

Gradus istos repperi,

Per quos gradus comperi,

Augeri et conteri

Gradus status hominis,

Prout datur dignitas,

Dignitatum quantitas

Quantitasque nominis

Magni parvus extiti,

Parvi magnus meriti,

Parvaeque sunt gratiae

Diviti contrariae;

Cui plus datur hodie,

Magis est obnoxius,

Quique minus habuit

Et minus attribuit,

Minus reddit gratiae.

Viri, fratres, praesules,

Rationis consules,

Me non imitemini,

Nec sic operemini

Super gregem domini;

Pervigil est animus,

Sit lumen in manibus,

Praesit custos renibus

Magnus maior maximus.