In Gedeonis area

Vellus aret extentum,

Et demolitur tinea

Regale vestimentum,

Superabundat palea

Quae sepelit frumentum,

Et loquitur iumentum,

Nec redit bos ad horrea,

Sed sequitur carpentum.

Exit rumor discriminis

De grandi montis cella,

Quae tam sanctae dulcedinis

Late fundebat mella,

Praeposteratur ordinis

Plautatio novella,

Dum movet in se bella,

Bases in summo culminis

Ponens, non capitella.

Clausa quondam religio

Vel otium secretum

Nunc subiacet obprobrio

Per vulgus indiscretum,

Quod tali tyrocinio

Non erat assuetum,

Nec confirmat decretum,

Non legis patrocinio

Nec literis est fretum.

Quod sanctum sacerdotium,

Quod unctio regalis

Se curvet ad imperium

Et vocem subiugalis,

Divinum est mysterium

An furor laicalis?

Favor tamen venalis,

Qui non intrat per ostium,

Fovet eos sub alis.

Vae vae, qui regis filiam

Das in manum lenonis,

Vae, qui profanas gloriam

Tantae devotionis,

Qui cellam pigmentariam

Et opus Salomonis

Fraude rapis praedonis,

Si certius inspicias

Ad rem conditionis.

Sub brevi doctus tempore

Stultus dum incappatur,

Pleno prophetat pectore,

Ructans interpretatur,

Et disputat cum rhetore

Qui tacet et miratur,

Quod vir iustus tollatur,

Et assumptus de stercore

Sententias loquatur.