1

Dum iuventus floruit,

Licuit et libuit

Facere quod placuit,

Iuxta voluntatem

Currere, peragere

Carnis voluptatem.

2

A modo sic agere,

Vivere tam libere,

Talem vitam ducere,

Viri vetat aetas,

Perimit et eximit

Leges assuetas.

3

Etas illa monuit,

Docuit, consuluit,

Sic et aetas annuit:

Nihil est exclusum,

Omnia cum venia

Contulit ad usum.

4

Volo resipiscere,

Linquere, corrigere

Quod commisi temere,

Deinceps intendam

Seriis, pro vitiis

Virtutes rependam.