Nomen a solemnibus

Trahit solemniacum;

Solemnis exigitur

Omnis, praeter monachum

Qui sibi virilia

Resecavit Sarracum;

Illum hinc excipimus

Tanquam daemoniacum,

Ipse solus lugeat

Reus apud Eacum.

Exultemus

Et cantemus

Canticum victoriae,

Et clamemus

Quas debemus

Laudes regi gloriae,

Qui salvavit

Vrbem David

A paganis hodie.

Festum agitur,

Dies recolitur,

In qua Dagon frangitur,

Natus Agar pellitur,

Abimelech vincitur,

Ierusalem eripitur

Et christianis redditur,

Dies, colamus igitur.

Haec urbs nobilissima

Primum regem habuit,

Haec eadem maxima

Domino conplacuit,

Et super apostolos

Spiritus intonuit.

Vrbs sacrata caelitus

Et amata superis,

Legis tabernaculum,

Templum archae et federis,

In hanc mittit Dominus

Ignem annis singulis,

Hospitale pauperum

Et asylum miseris.