Iudas gehennam meruit,

Quod Christum semel vendidit;

Vos autem mihi dicite,

Qui septies cottidie

Corpus venditis dominicum,

Quod superest supplicium?

Perpendite subtiliter,

Cum vendant dissimiliter,

Et peccent in alterutrum,

Sumendo plus vel modicum,

Quod anhelant munera,

Finis est avaritia.

Petrus damnato Simone

Gravi sub anathemate

Docuit, ut fidelibus

Non esset locus amplius

In donis spiritalibus

Ipsorum venditoribus.

Multi nunc damnant Simonem

Magum magis quam Daemonem,

Heredes autem Simonis

Suis fovent blanditiis:

Simon non est mortuus,

Sed vivit in heredibus.

Quamvis cogente Abraham

Ephron sumens pecuniam

Agrum sepulchro tribuit,

Ephron vocari meruit;

Sic Effrontes dicere

Multos potes simile.