1

Florebat olim studium,

Nunc vertitur in taedium;

Iam scire diu viguit,

Sed ludere praevaluit.

2

Iam pueris astutia

Contingit ante tempora,

Qui per malevolentiam

Excludunt sapientiam.

3

Sed retroactis seculis

Vix licuit discipulis

Tandem nonagenarium

Quiescere post studium.

4

At nunc decennes pueri

Decusso iugo liberi

Se nunc magistros iactitant,

Caeci caecos praecipitant.

5

Implumes aves volitant,

Brunelli chordas incitant,

Boves in aula salitant,

Stivae praecones militant.

6

In taberna Gregorius

Iam disputat inglorius,

Severitas Hieronimi

Partem causatur oboli.

7

Augustinus de segete,

Benedictus de vegete

Sunt colloquentes clanculo

Et ad macellum sedulo.

8

Mariam gravat sessio,

Nec Marthae placet actio,

Iam Liae venter sterilis,

Rachel lippescit oculis.

9

Catonis iam rigiditas

Convertitur ad ganeas,

Et castitas Lucretiae

Turpi servit lasciviae.

10

Quod prior aetas respuit

Iam nunc clarius claruit,

Iam calidum in frigidum

Et humidum in aridum,

11

Virtus migrat in vitium,

Opus transit in otium;

Nunc cunctae res debita

Exorbitant a semita.

12

Vir prudens hoc consideret,

Cor mundet at exoneret,

Ne frustra dicat: Domine!

In ultimo examine.

Quem iudex tunc arguerit,

Appellare non poterit.