1

O varium fortunae lubricum,

Dans dubium tribunal iudicium,

Non modicum parans huic praemium,

Quem colere tua vult gratia,

Et petere rotae sublimia,

Dans dubia tandem, praepostere

De stercore pauperem erigens,

De rhetore consulem eligens.

2

Edificat fortuna, diruit,

Nunc abdicat quos prius coluit,

Quos noluit iterum vindicat

Haec opera sibi contraria,

Dans munera nimis labilia;

Mobilia sunt sortis foedera,

Quae nobiles premens debilitat,

Et debiles ditans nobilitat.

3

Subsidio fortunae labilis

Cur proelio Troia iam nobilis

Nunc flebilis iacet incendio?

Quis sanguinis Romani gratiam,

Quis nominis Graeci facundiam,

Quis gloriam fregit Kartaginis?

Sors lubrica quae dedit abstulit,

Haec unica quae fovit perculit.

4

Quid Dario regnasse profuit?

Pompeio quid Roma tribuit?

Succubuit uterque gladio.

Eligere media tutius,

Quam petere rotae sublimius,

Et gravius a summo ruere.

Omnis qui se exaltat hodie,

Cras humiliabitur misere.